თითქმის ერთი თვეა TV25-ის ეთერში საინფორმაციო გამოშვება არ გადაიცემა, მანამდე კი არხმა პოლიტიკური თოქ-შოუს წარმოება შეაჩერა.
მაუწყებელმა აღნიშნულის შესახებ ოფიციალური განცხადება გაავრცელა, თუმცა არ განმარტავს რას უკავშირდება გადაწყვეტილება.
“პირველ რიგში, TV25-ის დიდი მხარდაჭერა გამოცემა “ბათუმელებისა” და “ნეტგაზეთის” დამფუძნებელსა და დირექტორს, მზია ამაღლობელს. TV25-ის დიდი მხარდაჭერა ყველა პოლიტპატიმარს. მოგეხსენებათ, 2025 წლის 1 იანვრიდან TV25-ის საინფორმაციო გამოშვებები და პოლიტიკური თოქ-შოუები შეჩერებულია. შეჩერებულია TV25-ის ვებგვერდი და ყველა სოციალური პლატფორმა. ყოველდღიურ რეჟიმში მიმდინარეობს მუშაობა, რათა არხმა დროულად შეძლოს დაუბრუნდეს სრულყოფილი მაუწყებლობის რეჟიმს. იმედს ვიტოვებთ, რომ ძალიან მალე დაგიბრუნდებით. P.S. ბოდიშს ვუხდით ჩვენს მაყურებელს და საზოგადოებას, რომ ასეთ რთულ ვითარებაში, ჩვენ ვერ ვიცავთ თქვენს ინტერესებს,” – წერია TV25-ის მიერ გავრცელებულ განცხადებაში.
