გიორგი გახარია, პარტია „გახარია საქართველოსთვის“ ლიდერი, მიიჩნევს, რომ თავდასხმის უკან ბიძინა ივანიშვილი დგას. თავის ბოლო განცხადებაში, რომელიც ფეისბუქზე გამოქვეყნდა, გახარიამ აღნიშნა, რომ „შერატონში“ მომხდარი ინციდენტის შემდეგ, ის ჩვეულ რიტმში ბრუნდება და სამუშაო პროცესს განაგრძობს.
„რაც შეეხება თავდასხმას, ეს იყო წინასწარ ორგანიზებული, ჩასაფრებით მოწყობილი, პოლიტიკური შურისძიება. თავდასხმის დამკვეთი – ბიძინა ივანიშვილი. ივანიშვილი დიდი ხანია მემუქრება მე და ჩემს ოჯახს, სხვადასხვა ფორმით და გზებით, მათ შორის, საჯაროდაც. მე არ მაინტერესებს ამ თავდასხმის შემსრულებლები. მე საქმე მაქვს ჩემზე თავდასხმის და მოქალაქეებზე ძალადობის დამკვეთთან. რაც შეეხება გამოძიებას, მათ ვაძლევთ შესაძლებლობას, შეინარჩუნონ სახე და არ გახდნენ ძალადობრივი დანაშაულების თანამონაწილე“ – წერს გიორგი გახარია სოციალურ ქსელში.
ინფორმაციისთვის: შესაბამისი სტრუქტურები დღემდე არ განმარტავენ დაიბარეს თუ არა დაზარალებულების მიერ დასახელებული პირები საგამოძიებო ორგანოში. საზოგადოებას დღემდე არ აქვს ინფორმაცია იმყოფებოდნენ თუ არა დაკითხვაზე, “ქართული ოცნების” წევრები, გიორგი მანველიძე და დიმიტრი სამხარაძე.
გიორგი გახარიასა და ზვიად ქორიძეზე თავდასხმის ფაქტზე გამოძიება დაიწყო
