ბოლო წლებია აჭარის მთავრობის სხდომები, მათ შორის სხვადასხვა სამთავრობო ღონისძიება დახურულ კარს მიღმა იმართება – მედიის გარეშე. ეს ტენდენცია თორნიკე რიჟვაძის მმართველობის პერიოდიდან იღებს სათავეს და დღემდე გრძელდება.
მიუხედავად იმისა, რომ არაერთი მნიშვნელოვანი გადაწყვეტილება მიიღება მთავრობის სხდომებზე, ეს პროცესი საზოგადოებისთვის კვლავ უცნობია. არც სხდომის დღის წესრიგი და არც მიღებული გადაწყვეტილებები ქვეყნდება, რაც ადგილობრივ მმართველობაში გამჭვირვალობის მნიშვნელოვან დეფიციტზე მიანიშნებს.
აჭარის მთავრობის არალეგიტიმური თავმჯდომარე, სულხან თამაზაშვილი, დღემდე არ გამოჩენილა მედიასთან საჯაროდ. მას არც პრესკონფერენცია გაუმართავს. იგი საჯარო შეხვედრებსა და აქტივობებს დახურულ ფორმატში ესწრება. “ქართულმა ოცნებამ” მას ნდობა დახურულ კარს მიღმა გამოუცხადა. სხდომა არ გადაიცემოდა პირდაპირ ეთერში. აჭარის არაკონსტიტუციურმა უმაღლესმა საბჭომ 2025 წლის რესპუბლიკური ბიუჯეტიც კარჩაკეტილ ფორმატში დაამტკიცა.
“აჭარა თაიმსმა” სცადა გაერკვია, რატომ მიმართა აჭარის მთავრობამ თვითიზოლაციის პოლიტიკას და რას უკავშირდება ეს გადაწყვეტილება. კითხვებს უმაღლესი საბჭოს დეპუტატმა, რომელიც ასევე არალეგიტიმურად მიიჩნევა არ უპასუხა. ცოტნე ანანიძემ კონკრეტულ კითხვებზე პასუხის ნაცვლად სხვა თემებზე საუბარი ამჯობინა.
აღსანიშნავია ისიც, რომ ინფორმაცია პროაქტიულად, წლებია აღარ ქვეყნდება აჭარის მთავრობისა და სამინისტროების ერთიან პორტალზე.
