საქართველოს შინაგან საქმეთა სამინისტროში საკადრო ცვლილება განხორციელდა — შს მინისტრის თანამდებობაზე ვახტანგ გომელაური გელა გელაძემ ჩაანაცვლა. გადაწყვეტილების შესახებ დღეს, 27 მაისს, ბრიფინგზე “ქართული ოცნების” პრემიერ-მინისტრმა ირაკლი კობახიძემ განაცხადა.
როგორც კობახიძემ განმარტა, გელა გელაძე გამოცდილი და კვალიფიციური იურისტია, რომელიც წლების განმავლობაში იკავებდა სხვადასხვა მაღალ თანამდებობას როგორც საჯარო, ისე კერძო სექტორში. ბოლო წლებში კი გელაძე თავდაცვის მინისტრის მოადგილე და სახელმწიფო უსაფრთხოების სამსახურის უფროსის მოადგილე იყო.
„დარწმუნებული ვარ, მისი ხელმძღვანელობით შინაგან საქმეთა სამინისტრო გააგრძელებს განვითარებას, წინსვლას და ზრუნვას თითოეული პოლიციელის ინტერესებზე. მინდა ბატონ გელას წარმატებები ვუსურვო ამ საპასუხისმგებლო თანამდებობაზე,“ — აღნიშნა ირაკლი კობახიძემ.
ვახტანგ გომელაურის წასვლის შესახებ განცხადება შსს-მ გაავრცელა.
„ეს გადაწყვეტილება ჩემთვის იოლი არ იყო. 2011 წლიდან ვიყავი იმ ბრძოლის თანამონაწილე, რომელსაც სათავეში ბატონი ბიძინა ივანიშვილი ჩაუდგა და რომელმაც ჩვენს ქვეყანას გარდამტეხი ცვლილებები მოუტანა,“ — წერს შსს.
გომელაურის თქმით, 10 წელზე მეტი ხნის განმავლობაში მსახურობდა მაღალი სახელმწიფო თანამდებობებზე — შინაგან საქმეთა მინისტრის, სახელმწიფო უსაფრთხოების სამსახურის უფროსისა და ვიცე-პრემიერის პოსტებზე.
„დღეს, როცა ქვეყანაში მშვიდი ვითარებაა, თავს მივეცი უფლება და გუნდს ვთხოვე თანამდებობის დატოვება, რაც მომცემს საშუალებას, რომ ოჯახს — მეუღლეს, შვილებს და ახლად შეძენილ შვილიშვილს მეტი დრო დავუთმო,“ — აღნიშნა გომელაურმა.
