საჯარო სამსახურში დასაქმებულ მრჩევლებს საქმიანობის გაგრძელება უსასყიდლოდ მოუწევთ — შესაბამისი ინიციატივა უკვე ინიცირებულია პარლამენტში. საკანონმდებლო ცვლილებები „საჯარო სამსახურის შესახებ“ კანონში შედის და მისი ავტორი „ქართული ოცნების“ დეპუტატებია.
კანონპროექტის მიხედვით, ის მრჩევლები, რომლებიც სახელმწიფო მოსამსახურის ან მასთან გათანაბრებული პირის მრჩევლის პოზიციაზე არიან დასაქმებული და საკუთარ საქმიანობას სამსახურებრივ საქმიანობასთან დაუკარგავად ახორციელებენ, ანაზღაურებას აღარ მიიღებენ.
ამჟამად მოქმედი კანონი სახელმწიფო-პოლიტიკური თანამდებობის პირებს აძლევს უფლებას, ანაზღაურებად მრჩევლად დანიშნონ შესაბამისი სპეციალისტები. ინიცირებული ცვლილებით კი, ეს პრაქტიკა იცვლება და მრჩევლის პოზიცია არანაზღაურებად სტატუსს იღებს. ცვლილება შეეხება ასევე საჯარო სამართლის იურიდიულ პირებსაც, გარდა შემდეგი კატეგორიებისა:
- კულტურული;
- საგანმანათლებლო;
- სამეცნიერო;
- კვლევითი;
- სპორტული;
- რელიგიური;
- წევრობაზე დაფუძნებული ორგანიზაციები.
კანონპროექტის განმარტებით ბარათში აღნიშნულია, რომ: „მრჩეველის პოზიცია მისი არსიდან გამომდინარე არ არის დატვირთული და ტოლფასი საჯარო სამსახურში სხვა ფორმით დასაქმებული პირებისა. შესაბამისად, მიზანშეწონილია, მრჩევლების საქმიანობა ანაზღაურებადი არ იყოს.“
