მოსამართლის განჩინების საფუძველზე ჩატარებული ოპერატიულ-სამძებრო და საგამოძიებო მოქმედებების შედეგად, სახელმწიფო უსაფრთხოების სამსახურის ანტიკორუფციულმა სააგენტომ ორგანიზებული ჯგუფის მიერ ჩადენილი თაღლითობის, უკანონო შემოსავლის ლეგალიზაციის, ყალბი დოკუმენტების დამზადებისა და გამოყენების საქმეზე ჯამში რვა პირი დააკავა და სისხლის სამართლის პასუხისგებაში მისცა. მათგან ორ პირს ბრალდება დაუსწრებლად წარედგინება და მათზე ძებნა გამოცხადდება.
როგორც სუს-ში გამართულ ბრიფინგზე განაცხადეს, გამოძიება შეეხება სს „საქართველოს რკინიგზის“ ყოფილი ხელმძღვანელი პირების საქმიანობას და სავარაუდო კორუფციულ სქემას, რომლის შედეგადაც სახელმწიფოს კუთვნილი დიდი ოდენობით ქონების მითვისება და მისი ლეგალიზაცია მოხდა.
გამოძიების ინფორმაციით, 2019 წელს სს „საქართველოს რკინიგზის“ მაშინდელმა გენერალურმა დირექტორმა დავით ფერაძემ შექმნა ორგანიზებული ჯგუფი, რომლის მიზანი კომპანიის კუთვნილი შავი ლითონის მოტყუებით დაუფლება და შემდგომ მისი რეალიზაცია იყო. საქმეში ფიგურირებენ კომპანიის ყოფილი მაღალჩინოსნები და რამდენიმე კერძო კომპანია.
სუს-ის ცნობით, დანაშაულებრივი სქემის ფარგლებში 2020-2021 წლებში უკანონოდ იქნა დაუფლებული „საქართველოს რკინიგზის“ კუთვნილი 22 120 ტონა შავი ლითონი, რომელიც შემდგომში 17,3 მილიონ ლარზე მეტად გაიყიდა. გამოძიების ვერსიით, თანხები სხვადასხვა კომპანიის ანგარიშებზე ირიცხებოდა, რის შემდეგაც ხდებოდა მათი განაღდება და განაწილება.
საქმის ერთ ეპიზოდში საუბარია ასევე 2022 წელს „საქართველოს რკინიგზასა“ და კერძო კომპანიას შორის გაფორმებულ ხელშეკრულებაზე, რომლის შესრულებისას, გამოძიების მტკიცებით, სამუშაოების მოცულობა ხელოვნურად გაიზარდა, რის შედეგადაც კომპანიამ დამატებით 403 844 ლარი მიიღო.
გამოძიება მიმდინარეობს თაღლითობის, ფულის გათეთრების, ყალბი დოკუმენტების დამზადებისა და სხვა მუხლებით, რაც სასჯელის სახით 9-დან 12 წლამდე თავისუფლების აღკვეთას ითვალისწინებს.
