სახელმწიფო აუდიტის სამსახურმა საქართველოს ცენტრალური საარჩევნო კომისიის 2023-2024 წლებში განხორციელებული საფინანსო-ეკონომიკური საქმიანობის შესაბამისობის აუდიტი ჩაატარა. ანგარიშის მიხედვით, სხვადასხვა მიმართულებით გამოვლინდა ფინანსური მართვისა და შიდა კონტროლის სისტემასთან დაკავშირებული არაერთი ხარვეზი.
აუდიტის თანახმად, შრომის ანაზღაურების ნაწილში ცესკოში თანამშრომელთა სამუშაო დროის აღრიცხვა სათანადოდ არ ხდებოდა, არ ივსებოდა სამუშაო დროის ტაბელები და შენობის ტურნიკეტის მონაცემები ბუღალტერიაში არ აისახებოდა, რაც კონტროლის მექანიზმების სისუსტეზე მიუთითებს.
დასკვნაში ყურადღება გამახვილებულია სახელფასო დანამატების გაცემის პრაქტიკაზეც. აუდიტის პერიოდში, ცესკოში მოქმედებდა დანამატების გაცემა კანონით დადგენილ ზღვრულ ოდენობაზე მეტი მოცულობით, რაც შესაბამისი შიდა გადაწყვეტილებების საფუძველზე ხდებოდა.
სახელმწიფო აუდიტმა ხარვეზები გამოავლინა შესყიდვების პროცესშიც. კერძოდ, აღნიშნულია, რომ ბაზრის კვლევის პროცესი სათანადოდ არ იყო დოკუმენტირებული და ვერ დგინდებოდა, რა მეთოდებითა და რა მოცულობით ტარდებოდა კვლევა. ასევე, სამშენებლო-სარემონტო სამუშაოების შესყიდვებისას ტექნიკური მოთხოვნები არასაკმარისად დეტალიზებული იყო, რაც, აუდიტის შეფასებით, არაკონკურენტული გარემოს ჩამოყალიბების რისკს ზრდიდა და პოტენციური მონაწილეების ინტერესს ზღუდავდა.
ანგარიშში ცალკე არის განხილული საარქივე და სასაწყობე ინფრასტრუქტურის მოწყობის მრავალწლიანი სახელმწიფო შესყიდვაც. აუდიტის მიხედვით, აღნიშნული პროცესი განხორციელდა შესყიდვების სააგენტოს მეთოდური მითითებების სრულად გათვალისწინების გარეშე, რამაც შესაძლოა გავლენა მოახდინა შესყიდვის ღირებულებისა და ეკონომიურობის შეფასებაზე.
დოკუმენტის მიხედვით, ხარვეზები გამოვლინდა მივლინებების ხარჯების ანაზღაურების მიმართულებითაც, სასტუმრო მომსახურების შესყიდვისას ადგილობრივი ბაზრის სრულყოფილი კვლევა არ ხდებოდა, რაც ხარჯების ზრდის მიზეზად სახელდება.
აქტივების მართვის ნაწილში აუდიტმა დაადგინა, რომ ცესკოს კანონით განსაზღვრული სავალდებულო ინვენტარიზაცია სრულად არ ჩაუტარებია, რის გამოც ორგანიზაციას აქტივებისა და ვალდებულებების ზუსტი აღრიცხვის შესაძლებლობა ეზღუდებოდა.
ანგარიშში ასევე საუბარია შიდა კონტროლის სისტემის ნაკლოვანებებზე. აუდიტის სამსახურის შეფასებით, შიდა აუდიტის სუბიექტის დამოუკიდებლობა კანონმდებლობით დადგენილი მოთხოვნების შესაბამისად სრულად უზრუნველყოფილი არ იყო.
ხარვეზები გამოვლინდა ავტოპარკის მართვასა და ტრანსპორტის ხარჯების ნაწილშიც. კერძოდ, სამორიგეო ავტომობილების თანამშრომლებზე გამოყოფა დოკუმენტურად არ დასტურდებოდა, საწვავის ხარჯვის ლიმიტების განსაზღვრის კრიტერიუმები არ არსებობდა, ხოლო დაქირავებული ტრანსპორტის მომსახურების ნაწილში გადაზიდვების მოცულობისა და მარშრუტების სრულყოფილი დოკუმენტაცია ვერ იქნა წარმოდგენილი.
