ბათუმის დინამოს პრეზიდენტს არჩილ ბერიძეს 2 წლით საფეხბურთო საქმიანობა აეკრძალა, გადაწყვეტილება საქართველოს ფეხბურთის ფედერაციის სადისციპლინო და დავების განმხილველი კომიტეტმა მიიღო.
“სადისციპლინო და დავების განმხილველმა კომიტეტმა შეისწავლა და განიხილა 2024 წლის 19 მაისს საქართველოს ეროვნული ლიგის ეგიდით ბათუმის “დინამოსა” და თბილისის “იბერია 1999”-ს შორის გამართული მატჩის მიმდინარეობისას და მატჩის დასრულების შემდეგ მომხდარი ფაქტები.
კომიტეტმა ფაქტების შესწავლის შედეგად დაადგინა რიგი დარღვევებისა, მათ შორის ბათუმის “დინამოს” პრეზიდენტმა არჩილ ბერიძემ მატჩის ოფიციალურ პირებს მიაყენა სიტყვიერი შეურაცხყოფა, ხოლო ერთ-ერთ ოფიციალურ პირს, კერძოდ არბიტრს, მიაყენა ფიზიკური შეურაცხყოფა. ასევე, მატჩის მომსახურე ოფიციალურ პირებს სიტყვიერი შეურაცხყოფა მიაყენა ბათუმის “დინამოს” მთავარმა მწვრთნელმა ანდრეი დემჩენკომ,” – წერია გავრცელებულ ინფორმაციაში.
სფფ-ის სადისციპლინო და დავების განმხილველი კომიტეტის გადაწყვეტილებით:
- ბათუმის “დინამოს” დაეკისრა ფულადი ჯარიმა ხუთასი ლარის ოდენობით.
- ბათუმის “დინამოს” ფეხბურთელს, ვიქტორ გონსალვესს დაეკისრა ფულადი ჯარიმა ორასი ლარის ოდენობით და დაისაჯა ორმატჩიანი დისკვალიფიკაციით;
- ბათუმის “დინამოს” მთავარ მწვრთნელს ანდრეი დემჩენკოს დაეკისრა ფულადი ჯარიმა ათასორასი ლარის ოდენობით და დაისაჯა ორმატჩიანი დისკვალიფიკაციით;
- გარდა ამისა, ბათუმის “დინამოს” პრეზიდენტს, არჩილ ბერიძეს, აეკრძალა საფეხბურთო საქმიანობა 2 წლის ვადით და დაეკისრა ფულადი ჯარიმა ექვსი ათას ორასი ლარის ოდენობით;
აქვე დაგაინტერესებთ: ბათუმის “დინამოს” პრეზიდენტის შვილი ცეცხლსასროლი იარაღის ტარების ბრალდებით დააკავეს
