ბათუმის ხელოვნების უნივერსიტეტის რექტორმა თანამდებობა დატოვა, ფაქტი “აჭარა თაიმს” თემურ კეჟერაძემ დაუდასტურა და განაცხადა, რომ გადაწყვეტილების მიზეზი “გადაღლა” გახდა.
უნივერსიტეტის უკვე ყოფილი რექტორი კატეგორიულად უარყოფს, რომ გადაწყვეტილება ამავე დაწესებულების დეკანისა და ოთხის სტუდენტის დაკავების ფაქტს უკავშირდებოდეს.
“გადავიღალე, ასაკში ვარ და რავიცი ჯანმრთელობის პრობლემებიც მაქვს. სხვა არაფერს უკავშირდება ეს გადაწყვეტილება,” – განაცხადა ჩვენთან საუბრისას თემურ კეჟერაძემ.
ინფორმაციისთვის: ინციდენტი სასწავლებლის შენობაში მოხდა. დაწესებულებაში ერთ-ერთი ლექტორის, თეა ცაგურიას ქმარი შეიჭრა და დეკანს ჯერ სიტყვიერად დაუპირისპირდა, რაც მოგვიანებით ფიზიკურ ძალადობაში გადაიზარდა. ირაკლი დევაძე ბათუმის მერიის მაღალჩინოსანია. ფაქტი უნივერსიტეტის სათვალთვალო კამერებმა ასახა, კადრები უკანონოდ თეა ცაგურიას ქმარმა მოიპოვა და სოციალურ ქსელში ატვირთა. კადრები კონტექსტისა და ხმის გარეშე პროპაგანდისტულმა მედიებმა გაავრცელეს.
ინციდენტამდე როგორც სტუდენტები ყვებიან მამუკა ჯორბენაძესა და თეა ცაგურიას შორის სიტყვიერ შელაპარაკებას ჰქონდა ადგილი. კერძოდ, ცაგურია სტუდენტებს ცინიკურად მიმართავდა და გაფიცულებს ნაცებს, ასევე, მოძალადეებს ეძახდა. ამ გარემოებამ კი, ჯორბენაძის გაღიზიანება გამოიწვია.
ცნობისთვის: დაკავებულები არიან: 1978 წელს დაბადებული მ.ჯ., 2004 წელს დაბადებული გ.მ., 2003 წელს დაბადებული დ.გ., 2002 წელს დაბადებული გ.დ. და 2004 წელს დაბადებული ა.კ.
ბათუმის ხელოვნების უნივერსიტეტის დეკანი და 4 სტუდენტი პატიმრობაში რჩებიან
