ბათუმში, გმირთა ხეივნის რეაბილიტაციის დასრულებიდან თითქმის ერთი წელი გავიდა, თუმცა ობიექტზე არაერთი ინფრასტრუქტურული პრობლემა კვლავ გადაუჭრელია. მიუხედავად იმისა, რომ პროექტი ოფიციალურად დასრულებულად გამოცხადდა და გახსნის გრანდიოზული ცერემონიაც გაიმართა, ხეივანი დღესაც არ არის სრულყოფილი.
ადგილზე არ მუშაობს შშმ და ეტლით მოსარგებლე პირებისთვის განკუთვნილი ლიფტები, დაკეტილია ჰიგიენის სივრცეები, არ მუშაობს შადრევნების უმეტესობა (6-დან 5 მწყობრიდანაა გამოსული), ღამით კი ლამპიონების ნაწილი გათიშულია. ასევე, მიუხედავად იმისა, რომ პროექტის ფარგლებში კომერციული ფართებიც აშენდა, მათი რეალურად დატვირთვა ჯერ არ მომხდარა და სივრცეები დაკეტილია.
ცნობისთვის: პროექტი მუნიციპალური განვითარების ფონდმა განახორციელა სახელმწიფო პროგრამა „განახლებული რეგიონების“ ფარგლებში და მისი ღირებულება 35 მილიონ ლარს აღწევს. თუმცა, როგორც მედიაპლატფორმა „ფაქტ-მეტრი“ იტყობინება, რეალურად ხეივნის მოწყობაზე გაცილებით მეტი თანხა დაიხარჯა, ვიდრე თავდაპირველ ხელშეკრულებაში იყო განსაზღვრული. გამოცემის ინფორმაციით, სამუშაოები ვადების დარღვევითა და საეჭვო გარემოებებით მიმდინარეობდა.
ინფორმაციისთვის: გმირთა ხეივანი ოფიციალურად ბათუმის მერიამ ჩაიბარა, თუმცა კითხვას, რატომ მიიღეს დასრულებულად ობიექტი არსებული ხარვეზების ფონზე, ადგილობრივი თვითმმართველობა პასუხს არ სცემს. “ქართული ოცნების” საკრებულოს დეპუტატები აცხადებენ, რომ პრობლეის შესახებ არაინფოორმირებულები არიან და აღნიშნავენ, რომ საკითხით დაინტერესდებიან.
გარემოება: ცხადია, „აჭარა თაიმსი“ კითხვებით მიმართავდა ბათუმის მერიას. თუმცა, როგორც ცნობილია, „ქართული ოცნების“ ხელისუფლება არ თანამშრომლობს დამოუკიდებელ და ობიექტურ მედიასთან — მათ შორის, ისინი საჯარო შეხვედრებსაც იზოლირებულ სივრცეში ატარებენ. იმ შემთხვევაში, თუ ამ მასალის გამოქვეყნების შემდეგ თვითმმართველობას სურვილი გაუჩნდება საკუთარი პოზიციის დაფიქსირების, მათი კომენტარი სტილის დაცვით გამოქვეყნდება და მასალა განახლდება.
