ინფორმაციის თავისუფლების განვითარების ინსტიტუტის ცნობით, 2024 წლის სახელმწიფო ბიუჯეტის მონაცემების მიხედვით, შრომის ანაზღაურებაზე გაწეული ხარჯები წინა წელთან შედარებით 19%-ით გაიზარდა, რაც 409 მილიონი ლარის ზრდას ნიშნავს. აღნიშნული ზრდა შრომის ანაზღაურების მნიშვნელოვნად მომატებულ ხარჯებს უკავშირდება.
ორგანიზაიის ინფორმაციით, ყველა ამ ხარჯში განსაკუთრებული ყურადღება ექცევა შტატგარეშე მოსამსახურეთა ანაზღაურებაზე გაწეულ ხარჯებს. 2013 წლიდან, ეს ხარჯები ყოველწლიურად იზრდება, ამჯერად კი 90.7 მილიონი ლარიდან 592.6 მილიონ ლარამდე მოიმატა, რაც მეტწილად აღნიშნული კატეგორიის თანამშრომელთა რიცხვისა და ანაზღაურების გაზრდის შედეგია.
რაც შეეხება ავტომობილებისა და ტექნიკის ექსპლუატაციისა და მოვლა-შენახვის ხარჯებს, 2024 წელს ეს თანხა რეკორდული, 178 მილიონი ლარი შეადგინა, რაც ბიუჯეტში უპრეცედენტო ზრდას ნიშნავს.
საინტერესოა, რომ 2024 წელს სახელმწიფო ბიუჯეტიდან წარმომადგენლობით ღონისძიებებზე (სარესტორნო მომსახურება, საჩუქრები და ა.შ.) 30.8 მილიონი ლარი დაიხარჯა, რომელიც საჯარო ღონისძიებების ორგანიზებასა და პროტოკოლური ხარჯების დაფარვას მოიცავს.
ბიუჯეტის კიდევ ერთი თვალსაჩინო მაჩვენებელი არის დასაქმებულთა რიცხვი სსიპ-ებში და ა(ა)იპ-ებში (მუნიციპალიტეტების გარდა), სადაც 2024 წელს მუშაობდა 189.5 ათასი ადამიანი, რაც ისტორიული მაღალი მაჩვენებელია. ბოლო 10 წლის განმავლობაში სსიპ-ების და ა(ა)იპ-ების შტატგარეშე თანამშრომელთა რაოდენობა დაახლოებით გაორმაგდა და 73.6 ათასი ადამიანი შეადგინა. მხოლოდ ერთ წელიწადში ეს რიცხვი 25%-ით გაიზარდა.
ამასთან, აღნიშნული მონაცემები იმაზე მიუთითებს, რომ სახელმწიფო სტრუქტურებში ხარჯები და დასაქმებულთა რაოდენობა მუდმივად იზრდება, რაც მნიშვნელოვანი გამოწვევაა ქვეყნის ფისკალური სტაბილურობისა და რესურსების ეფექტიანობისათვის.
