ბათუმში, გოგოლის ქუჩაზე მდებარე მრავალბინიანი კორპუსები სახელმწიფოს ქონებაა და მათი გამოყენება სოციალური მიზნებისთვის იგეგმება. ამის შესახებ ადგილზე შეკრებილ მოქალაქეებს „ქართული ოცნების“ აჭარის ჯანდაცვის მინისტრმა, ნინო ნიჟარაძემ განუცხადა.
მისი თქმით, ოჯახებმა განცხადებით უნდა მიმართონ ქალაქ ბათუმის მერიას, სადაც სხვადასხვა უწყების წარმომადგენლებისგან შემდგარი სპეციალური კომისია ფუნქციონირებს და თითოეული განცხადება ინდივიდუალურად, დადგენილი კრიტერიუმების შესაბამისად განიხილება.
„გოგოლის ქუჩაზე მდებარე მრავალბინიანი კორპუსები არის სახელმწიფოს ქონება და მთავრობის გადაწყვეტილებით გათვალისწინებული იქნება სოციალური მიზნებისთვის. სპეციალური კომისიის მიერ თითოეული განცხადება იქნება ინდივიდუალურად შესწავლილი და ვინც დააკმაყოფილებს კრიტერიუმებს – როგორიცაა უსახლკარო მოქალაქე, სოციალური ქულა, შშმ სტატუსი, ეკომიგრანტი და ა.შ. აუცილებლად მიიღებს ბინას. გარდა ამისა, აღნიშნული შენობა დღევანდელი მოცემულობით არ აკმაყოფილებს საცხოვრებელ პირობებს, ამიტომ დამატებითი სამუშაოები იქნება ჩასატარებელი, რასაც დასჭირდება გარკვეული დრო“ – განაცხადა ნინო ნიჟარაძემ.
რაც შეეხება ვადებს, მინისტრმა ვერ დააკონკრეტა, რა პერიოდში იქნება კორპუსები საცხოვრებლად ვარგისი ან როდის დაიწყებს კომისია განცხადებების განხილვას.
ამასთან, გოგოლის ქუჩაზე შეკრებილი მოქალაქეების ნაწილი სკეპტიკურად უყურებს პროცესს და აცხადებს, რომ არსებობს რისკი, ბინები ისეთმა პირებმა მიიღონ, რომლებიც რეალურად დახმარებას არ საჭიროებენ. ისინი პარალელს ავლებენ ე.წ. „ოცნების ქალაქთან“ და შიშობენ, რომ პროცესი ამ შემთხვევაშიც არასამართლიანად წარიმართება.
ბათუმში, გოგოლის ქუჩაზე საპროტესტო აქცია უკვე მესამე დღეა მიმდინარეობს. ადგილზე იმყოფებიან მოქალაქეები, რომლებიც აცხადებენ, რომ უსახლკაროები არიან.
საუბარია ქონებაზე, რომელიც თურქ ბიზნესმენ გალიფ ოზთურქს ჩამოართვეს. როგორც ცნობილია, მასთან გაფორმებული საპროცესო შეთანხმების ფარგლებში, სახელმწიფოს სასარგებლოდ ჩამოერთვა ბათუმში მდებარე 16 081 კვადრატული მეტრი მიწის ნაკვეთი და მასზე განთავსებული შვიდი კორპუსი. აღნიშნული შენობები თავის დროზე უნებართვოდ იყო აშენებული.
