ბათუმის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და ავტოსაგზაო შემთხვევის შედეგად სამი პირის გარდაცვალების ფაქტზე ბრალდებული დამნაშავედ ცნო.
სასამართლოში გამოკვლეული მასალების მიხედვით დადგინდა, რომ 2025 წლის 14 ივნისს ბრალდებული ბათუმიდან სარფის მიმართულებით გადაჭარბებული სიჩქარით გადაადგილდებოდა. მან ვერ უზრუნველყო ავტომობილის უსაფრთხო მართვა და გაჩერებულ სატვირთო ავტომობილს შეეჯახა. ავარიის შედეგად მიღებული დაზიანებებით მსუბუქ ავტომობილში მყოფი სამი პირი გარდაიცვალა.
ბრალდებულს ბრალი საქართველოს სისხლის სამართლის კოდექსის 276-ე მუხლის მე-8 ნაწილით წარედგინა, რაც ავტომობილის მოძრაობის უსაფრთხოების წესის დარღვევას გულისხმობს და რომელმაც ორი ან მეტი ადამიანის სიცოცხლის მოსპობა გამოიწვია.
ბათუმის საქალაქო სასამართლომ ბრალდებული სრულად ცნო დამნაშავედ წარდგენილ ბრალდებაში და სასჯელის სახედ და ზომად 7 წლითა და 6 თვით თავისუფლების აღკვეთა განუსაზღვრა.
