„დავით გაბაიძე არსაიდან მოვიდა — კალოშებით, ერთი ჩვეულებრივი სოფლელი, რომელმაც არაფრისგან მოიპოვა თანამდებობა, და დღეს ქუჩაში გამოსვლაც აღარ შეუძლია. კაბინეტში არ მიმიღო — დაიმალა,“ – ამის შესახებ დავით რობაქიძემ “აჭარა თაიმსთან” საუბრისას განაცხადა.
ლეობორისტული პარტიის აჭარის ორგანიზაციის ხელმძღვანელი ერთ-ერთია იმ პირებს შორის, რომელიც პოლიციამ 5 ათასი ლარით დააჯარიმა. მას მოსამართლის შესაბამისი განჩინება უკვე ჩაბარდა.
დაჯარიმების შემდეგ, მან რეგიონის საკანონმდებლო ორგანოსთვის წერილის გაგზავნა სცადა, რომლითაც ის აჭარის უმაღლესი საბჭოს არალეგიტიმურ თავმჯდომარეს – დავით გაბაიძეს, დაკისრებული ჯარიმის გადახდას სთხოვდა. თუმცა, კანცელარიამ წერილის მიღებაზე უარი განაცხადა ტექსტის შინაარსის გამო.
როგორც დავით რობაქიძე აცხადებს, ამის შემდეგ დავით გაბაიძესთან პირადად გასაუბრების მცდელობა ჰქონდა, თუმცა მისი თქმით, აჭარის უმაღლესი საბჭოს თვითგამოცხადებული თავმჯდომარე დაიმალა და კომუნიკაცია ვერ შედგა.
დავით რობაქიძის თქმით, აღნიშნული დაჯარიმება ე.წ. ხელისუფლების მხრიდან თავისუფალი სიტყვის ჩახშობის მორიგი მცდელობაა, თუმცა სამოქალაქო პროტესტს ვერაფერი შეაჩერებს.
ინფორმაციისთვის: საქმე ეხება “ზებრაზე გადასვლის” ფორმით გამართულ პროტესტს, რომლის ფარგლებშიც რობაქიძე მშვიდობიან აქციაში მონაწილეობდა.
„ზებრაზე გადასვლის საქმე“ – 23 ადამიანი 5 000 ლარით დააჯარიმეს
