თბილისსა და მარნეულში მოქმედ საწარმოებში გარემოსდაცვითი ზედამხედველობის დეპარტამენტის მიერ განხორციელებული ინსპექტირების შედეგად, დადგენილ რეგულაციასთან შეუსაბამოდ წარმოებული დაახლოებით 2.5 ტონა პლასტიკის პარკი დალუქეს.
გარდა ამისა, 14 სახეობის პარკის ნიმუში გადაგზავნილია შესაბამის ლაბორატორიაში, სადაც მათ მძიმე მეტალების შემცველობასა და დეგრადაციის ხარისხს შეისწავლიან. ლაბორატორიული კვლევის დასრულების შემდეგ, ტექნიკური რეგლამენტის დარღვევის ფაქტების გამოვლენის შემთხვევაში, დეპარტამენტი კანონით გათვალისწინებულ რეაგირებას მოახდენს.
“ჩვენი მიზანია, ტექნიკური რეგლამენტის მოთხოვნებთან შეუსაბამო პარკები საცალო ქსელში არ მოხვდეს, რაც გარემოს დაბინძურების პრევენციასაც ემსახურება,”- წერია გარემოსდაცვითი ზედამხედველობის დეპარტამენტის მიერ გავრცელებულ ინფორმაციაში.
ინფორმაციისთვის: 2018 წლის 1 ოქტომბრიდან საქართველოში შეწყდა გარკვეული სისქის პოლიეთილენის პარკების წარმოება, ხოლო 2019 წლიდან აიკრძალა არაბიოდეგრადირებადი პარკების წარმოება, გამოყენება და იმპორტი. შესაბამისი რეგულაციები მიზნად ისახავს პლასტიკური ნარჩენების შემცირებას და ქვეყნის ეკოლოგიური უსაფრთხოების გაუმჯობესებას.
