ბათუმში, გრიგოლ ელიავას ქუჩის №24-ში მდებარე მრავალბინიანი კორპუსის მშენებლობა ხელშეკრულებით გათვალისწინებულ ვადებში არ დასრულდა. ბინა ექსპლუატაციაში 2023 წელს უნდა შესულიყო, თუმცა მესაკუთრეთა თქმით, სამუშაოები შეჩერებულია და ობიექტი მიტოვებულია.
კორპუსში ბინები 172 ოჯახს აქვს შეძენილი, თუმცა მათ დღემდე არ გააჩნიათ არანაირი ოფიციალური ინფორმაცია მშენებლობის დასრულებისა და საკუთრების უფლებების გადაცემის თარიღზე. მაცხოვრებლები აცხადებენ, რომ მშენებელი კომპანია — შპს “გარდენ პალასი” — კითხვებზე პასუხს არ სცემს და კომუნიკაცია მთლიანად შეწყვეტილია.
მესაკუთრეთა ნაწილმა დღეს ადგილზე საპროტესტო აქცია გამართა და შესაბამისი სახელმწიფო უწყებების ჩარევა მოითხოვა. მათი მთავარი მოთხოვნაა, აჭარის მთავრობის და სამართალდამცავი ორგანოების ყურადღება მიექცეს შექმნილ მდგომარეობას.
„დაირღვა პირობები, არ ჩაგვბარდა ბინა. კომპანია პასუხისმგებლობას გაურბის, არ გამოდიან კონტაქტზე. 172 ოჯახი ვართ საკუთრების გარეშე. ვითხოვთ ბინების დროულად ჩაბარებას. ძალიან დავზარალდით — ნაწილმა ქირით ცხოვრება ვეღარ გააგრძელა და დაუსრულებელ კორპუსში შესახლდა,“ — განაცხადა ერთ-ერთმა მესაკუთრემ „აჭარა თაიმსთან“ საუბრისას.
ადგილობრივების თქმით, მშენებელი კომპანიის დირექტორი ვაჟა თურმანიძე მათ ზეწოლით ემუქრება: „მისი მამა შუახევის პოლიციის განყოფილების უფროსია და გავლენებით გვემუქრება. რაც არ უნდა მოვიმოქმედოთ, როგორც თავად ამბობს, არაფერი გამოგვივა.“
ინფორმაციისთვის: შპს “გარდენ პალასის” წარმომადგენლები — იუსუფ და ვაჟა თურმანიძეები — არ პასუხობენ სატელეფონო ზარებს, შესაბამისად მათი პოზიციის მოსმენა ვერ მოვახერხეთ.
გარემოება: ბათუმში დაუმთავრებელი და ექსპლუატაციაში არშესული კორპუსების პრობლემა სისტემური და გრძელვადიანია. ასეულობით ობიექტი დღესაც ან მიტოვებულია, ან შეჩერებული, რის გამოც ათასობით ოჯახი საცხოვრებლის გარეშეა დარჩენილი. მიუხედავად იმისა, რომ წლების განმავლობაში ამ პრობლემაზე ადგილობრივები აქტიურად საუბრობენ და შესაბამის უწყებებს რეაგირებას სთხოვენ, რეალური ნაბიჯები პრაქტიკულად არ იდგმება. მშენებლობის სფეროში არსებული მარეგულირებელი მექანიზმების სისუსტე და კონტროლის ნაკლებობა პრობლემას კიდევ უფრო ამწვავებს.
ცნობისთვის: ცხადია, „აჭარა თაიმსი“ კითხვებით მიმართავდა ბათუმის მერიას. თუმცა, როგორც ცნობილია, „ქართული ოცნების“ ხელისუფლება არ თანამშრომლობს დამოუკიდებელ და ობიექტურ მედიასთან — მათ შორის, ისინი საჯარო შეხვედრებსაც იზოლირებულ სივრცეში ატარებენ. იმ შემთხვევაში, თუ ამ მასალის გამოქვეყნების შემდეგ თვითმმართველობას სურვილი გაუჩნდება საკუთარი პოზიციის დაფიქსირების, მათი კომენტარი სრულად გამოქვეყნდება და მასალა განახლდება.
