საბა გოგიტიძე ხის სათამაშოებს 14 წლიდან ქმნის, მანამდე ოსტატი დეკორტაციებს მუყაოსა და პლასტიკისგან აკეთებდა. გვიყვება, რომ ჰობი ახლა საყვარელ საქმიანობად იქცა. სათამაშოების შექმნისას იყენებს ეკოლოგიურად სუფთა ხეს, საღებავების მინარევების გარეშე.
ნატურალურად სუფთა პროდუქციას მომხმარებლების სურვილისა და დიზაინის მიხედვით ამზადებს, შესაბამისად მისი საქმიანობის სფერო საკმაოდ მრავალფეროვანია. ამბობს, რომ ერთი კონკრეტული სათამაშოს დამზადება მის ფორმასა და სპეციფიკაზეა დამოკიდებული.
“ეს საქმე საწყისი ეტაპიდან ბოლომდე უდიდეს სიამოვმებას მანიჭებს და მხოლოდ საქმის სიყვარულია ის, რაც მაკეთებინებს ამ ყოველივეს. კარგი გრძნობაა, როცა ხედავ შენს მიერ დამზადებულ სათამაშოთი ბავშვი როგორი ინტერესით თამაშობს,” – გვიყვება ახალგაზრდა ოსტატი ქედიდან.
ეკოლოგიურად სუფთა სათამაშოების დამზადება, როგორც თავად ამბობს დიდ შრომასა და ენერგიას მოითხოვს, მაგრამ პროცესი იმდენად სასიამოვნოა დაღლა მისთვის მეორეხარისხოვანია. პირველი გრანტით ის ხელსაწყოები იყიდა, რამაც მას საქმიანობა გაუმარტივა.
“სამომავლო გეგმებში ალბათ სტაბილური ბაზრის მოპოვება და ბევრი კმაყოფილი მომხმარებლის შეძენაა,”- გვიყვება ოსტატი.
საბა ბსუ-ს მეორე კურსელია. სტუდენტი ხის სათამაშოებს ონლაინ და ბათუმში, ადგილობრივ ბაზარზე ყიდის. ოსტატის ნამუშევრების ნახვა ჟორდანიას ქუჩის 4 ნომერშია შესაძლებელი. ამბობს, რომ ხის სათამაშოებზე მოთხოვნა და ინტერესი საკმაოდ დიდია. საბა სათამაშოების გარდა სუვენირებსაც ამზადებს.
