ბათუმის ხელოვნების უნივერსიტეტში მომხდარის ინციდენტის შემდეგ, თეა ცაგურია სამსახურში არ დადის, თუმცა მას სტატუსი არ შეჩერებია. ორდღიანი მცდელობის მიუხედავად, უნივერსიტეტში ჩვენს სატელეფონო ზარებს არ უპასუხეს.
“აჭარა თაიმსი” ინფორმაციის დაზუსტების მიზნით დღეს, 29 იანვარს, ხელოვნების უნივერსიტეტში მივიდა და იურიდიული სამსახურის წარმომადგენელთან გასაუბრება სცადა, თუმცა ხათუნა ჯოხაძემ ჩვენს კითხვებს ვერ უპასუხა. მან ისიც კი ვერ განმარტა თუ რის საფუძველზე უნარჩუნდება თეა ცაგურიას ლექტორის სტატუსი.
ჩვენი კითხვები უპასუხოდ დატოვა ხელოვნების უნივერსიტეტის რექტორის მოვალეობის შემსრულებელმაც. ინგა ხალვაშმა საკითხის დაზუსტების მიზნით კვლავ იურიდიულ სამსახურთან გადაგვამისამართა.
“17 თებერვლამდე არდადეგებია, რადგან სასწავლო პროცესი შეფერხდა საგანი გადამიტანეს შემდეგ სემეტრში. ასევე, საკითხზე კომუნიკაცია მქონდა რექტორის მოვალეობის შემსრულებელთან,” – ასე გვიპასუხა თეა ცაგურიამ და ინგა ხალვაშთან მიმოწერის სქრინი გვაჩვენა.
მიმოწერის სქრინის თანახმად, რექტორის მოვალეობის შემსრულებელი თეა ცაგურიას საკითხის გარკვევას დაჰპირდა, თუმცა ინგა ხალვაშს საბოლოო პასუხი ცაგურიასთვის არ გაუცია.
გარემოება: თეა ცაგურია სამსახურში მას შემდეგ არ გამოცხადებულა, რაც მის ქმარს, უნივერსიტეტის დეკანსა და სტუდენტებს შორის ფიზიკური დაპირისპირება მოხდა.
ცნობისთვის: ბათუმის საქალაქო სასამართლომ ხელოვნების უნივერსიტეტის დეკანი, მამუკა ჯორბენაძე და სამი სტუდენტი – გურამ მიქელაძე, დავით გვიანიძე და გიორგი დავითაძე 5 000 ₾არიანი გირაოს სანაცვლოდ გუშინ გაათავისუფლა.
ინფორმაციისთვის: ბათუმის ხელოვნების უნივერსიტეტი ხვალ, 30 იანვარს, რექტორის მოვალეობის შემსრულებელს ექვსი თვის ვადით აირჩევს. უნივერსიტეტში “აჭარა თაიმს” განუცხადეს, რომ არჩევნებში ორი კანდიდატი, მამუკა ალაფიშვილი და სოფიო თავაძე მონაწილეობენ.
ორივე კანდიდატი ამავე უნივერსიტეტის ასოცირებული პროფესორია. ცნობისთვის, რექტორის თანამდებობა მას შემდეგ გახდა ვაკანტური, რაც თემურ კეჟერაძემ თანამდებობა საკუთარი განცხადების საფუძველზე დატოვა.
