საქართველოს პროკურატურამ ირაკლი ღარიბაშვილს განსაკუთრებით დიდი ოდენობით უკანონო შემოსავლის ლეგალიზაციის საქმეზე ბრალდება წარუდგინა.
შსს-ის ანტიკორუფციული დეპარტამენტის გამოძიებით დადგინდა, რომ 2019-2024 წლებში თავდაცვის მინისტრისა და პრემიერ-მინისტრის თანამდებობების დაკავების პერიოდში, ირაკლი ღარიბაშვილი ფარულად იყო ჩართული სხვადასხვა ბიზნესსაქმიანობაში, რაც საჯარო თანამდებობის პირისთვის კანონით აკრძალულია.
გამოძიების მიხედვით, ღარიბაშვილი თანამდებობაზე ყოფნისას იღებდა განსაკუთრებით დიდი ოდენობით არალეგალურ შემოსავალს და მისი წარმომავლობის დასაფარად დეკლარაციებში მიუთითებდა ყალბ მონაცემებს — თითქოს ოჯახის წევრისგან საჩუქრად იღებდა თანხებს. ამ გზით, 830 000 ლარის ოდენობის უკანონო შემოსავალი მოხვდა ლეგალურ ბრუნვაში.
პროკურატურის ცნობით, მან 2023–2024 წლებში დაუსაბუთებელი შემოსავლით შეიძინა ორი ავტომანქანა (ღირებულება – 463 630 ლარი), ასევე ოჯახის წევრის მეშვეობით – 210 000 ლარად ერთ-ერთი კომპანიის 100%-იანი წილი, რომელსაც უძრავი ქონება გააჩნდა. ამასთან, მის ოჯახთან დაკავშირებულ შპს-ში ინვესტირებულ იქნა 3 670 172 ლარი.
გამოძიების ინფორმაციით, უკანონო შემოსავლის ძირითადი ნაწილი – 6 500 000 აშშ დოლარი – უცხოურ ვალუტაში იქნა დაკონვერტირებული და 2025 წლის 17 ოქტომბერს ამოღებულ იქნა ღარიბაშვილის ბინიდან ჩხრეკისას.
ბრალდება წარდგენილია საქართველოს სისხლის სამართლის კოდექსის 194-ე მუხლის მესამე ნაწილის „გ“ ქვეპუნქტით – განსაკუთრებით დიდი ოდენობით უკანონო შემოსავლის ლეგალიზაციის ფაქტზე. პროკურატურის ცნობით, ირაკლი ღარიბაშვილმა წარდგენილ ბრალდებაში თავი სრულად ცნო დამნაშავედ.
გარდამავალი ეტაპის ფარგლებში, პროკურატურა სასამართლოს მიმართავს 1 000 000 ლარის ოდენობის გირაოს შეფარდების შუამდგომლობით, ასევე – პასპორტის ჩამორთმევისა და ქვეყნის დატოვების აკრძალვის მოთხოვნით.
