აჭარის ტურისტული პოტენციალის პოპულარიზაციის მიზნით ბათუმში იტალიელი ჟურნალისტები იმყოფებიან.
აჭარის შესახებ საგანმანათლებლო, დოკუმენტური შინაარსის სიუჟეტს ცნობილი იტალიური იუთუბ არხის ნოვა ლექტიოს ჟურნალისტი ამზადებს.
იტალიურ მედიას ჩვენი ქვეყნის ღირსშესანიშნაობების გაშუქებაში ტურის მენეჯერი ანა აბუაშვილი და ჟურნალისტი/მედია კოლაბორატორი მარიამ პაკაცოშვილი ეხმარებიან.
,,რამდენიმე დღეა აჭარაში ვიმყოფებით და გაოცებული ვართ ქართველი ხალხის სტუმართმოყვარეობით. ჩვენ გადავიღეთ მაღალმთიანი აჭარა და ბათუმის ტურისტული, ისტორიული ზონები. ვფიქრობ, შთამბეჭდავი ტური გამოვიდა და ამისთვის მადლობა ქართველ ხალხს”. სიმონე გუიდა- ნოვა ლექტიოს წამყვანი ჟურნალისტი.
გადამღებმა ჯგუფმა მოინახულა აჭარის მაღალმთიანეთი, ხულო, შუახევი და ქედა, სადაც ადგილობრივების ყოფა ცხოვრებას, ტოლერანტობას და ტრადიციებს გაეცნენ, მთიან აჭარაში გადაღებული კადრებიც კლიპში აისახება.
სიუჟეტში ასევე წარმოჩენილი იქნება აჭარის პოლიტიკური მოწყობა და სეპარატიზმი, ადგილობრივი ბიზნესის განვითარება, პორტის ისტორიული მნიშვნელობა და საერთაშორისო ვაჭრობის მასშტაბები.
,,ჩვენ ჩავწერეთ ადგილობრივი ბიზნესმენები, ისტორიკოსები, ანთროპოლოგები… იტალიელ მეგობრებს ასევე მაღალმთიან აჭარაში ვაჩვენეთ, როგორ მიმდინარეობს თანაცხოვრება მუსლიმებსა და მართლმადიდებლებს შორის. დავაგემოვნებინეთ ნამდვილი ქართული, ავთენტური კერძები, გავაცანით ჩვენი ქვეყნის ისტორია და ამჟამინდელი ყოფა-ცხოვრება. ვფიქრობ, საინტერესო და ისტორიული, დოკუმენტური შინაარსის სიუჟეტი მომზადდება, რაც მსოფლიო ასპარეზზე ჩვენი ქვეყნის მთავარ ღირსებებს კიდევ ერთხელ წარმოაჩენს”- მარიამ პაკაცოშვილი, მედია კოლაბორატორი.
აჭარის ტურისტულ ლოკაციებზე ვიდეორგოლის მომზადების მთავარი მიზანი ჩვენი სამშობლოს პოპულარიზაციაა.
,,აჭარა ჩვენი ქვეყნის ერთ-ერთი გამორჩეული კუთხეა, თავისი წეს-ჩვეულებებით, ბუნებით და ადამიანებით. მას ულევი ტურისტული პოტენციალი გააჩნია. ხუთი დღის განმავლობაში მე და მარიამმა ვუმასპინძლეთ იტალიურ მედიას, რომელსაც ვანახეთ აჭარის ყველა მხარე, დაწყებული მაღალმთიანი აჭარის სოფლებით და დამთავრებული სათამაშო ბიზნესის ინდუსტრიით. აღსანიშნავია, ჩვენი რესპონდენტების და აჭარლების გვერდში დგომა, რასაც ნებისმიერ წუთას ვგრძნობდით. მინდა მადლობა გადავუხადო ყველას და შედეგსაც მალე ვიხილავთ”! ანა აბუაშვილი- ტურის მენეჯერი.
ამ არხს (Nova Lectio) იტალიაში 2 მილიონამდე ადამიანი უყურებს, მათ შორის ჩვენი ქართველი ემიგრანტები.
სიუჟეტი იტალიის ტელე ეკრანებზე ნოემბრის ბოლოს გავა.
