„ოცნების ქალაქში”, სადაც კორპუსების მშენებლობა იგეგმება, თუნუქის ფირფიტებით შეღობეს, თუმცა რამდენიმე კვადრატული მეტრი ტერიტორია გამოტოვეს. ადგილი, სადაც თხრილში ორი ბავშვი ჩავარდა და დაიღუპა მხოლოდ მიწით ამოავსეს. რკინის ღობე, ბავშვების დაღუპვის ადგილიდან დაახლოებით 5 მეტრში გაავლეს, ღია მდგომარეობაში მხოლოდ ტრაგედიის ადგილი დატოვეს.
ის, რომ ბავშვების დაღუპვის ადგილი არ შემოსაზღვრეს, ხელისუფლების მთავარ არგუმენტს – „იქ არ იყო სამშენებლო მოედანი“, კიდევ უფრო ამყარებს. არადა, ამავე ადგილზე ხის ფიცრულები თავის დროზე სწორედ სამშენებლო მოედნის მომზადების მიზნით დაანგრიეს.
ორი მოზარდის დაღუპვიდან ერთ თვეზე მეტი გავიდა, მაგრამ დღემდე არაა მთავარ კითხვაზე პასუხი გაცემული – რატომ არ იყო სამშენებლო უსაფრთხოება დაცული დასახლებაში, რასაც კანონი მოითხოვს.
რატომ არ იყო სამშენებლო უსაფრთხოება დაცული – მთავარ კითხვას აჭარის ეკონომიკის მინისტრი და ბათუმის საკრებულოს თავმჯდომარე არ პასუხობდნენ მაშინაც, როცა დასახლებაში ტრაგიკული შემთხვევა მოხდა. ნახეთ კომენტარები “აჭარა თაიმსის” არქივიდან.
მაშინ, როცა “ოცნების ქალაქში” ტრაგიკული შემთხვევა მოხდა მოქალაქეები სამშენებლო უსაფრთხოების დაუცველობაზე ღიად საუბრობდნენ, თუმცა მათ გაჩუმებას “ქართული ოცნების” მხარდამჭერები და აქტივისტები ცდილობდნენ. ნახეთ კომენტარები “აჭარა თაიმსის” არქივიდან.
რას ამბობდა ხალხი 2 ბავშვის დაღუპვის ფაქტზე – დამატებითი კომენტარები “აჭარა თაიმსის” არქივიდან.
სრულ ჩანაწერს “ოცნების ქალაქიდან” ნახავთ ბმულზე
