„პლატფორმა 2025“ საქართველოს დემოკრატიულ ძალებს, სამოქალაქო ორგანიზაციებს, პოლიტიკურ პარტიებს, საზღვარგარეთ მცხოვრებ თანამემამულეთა გაერთიანებებსა და აქტიურ მოქალაქეებს თანამშრომლობის გაღრმავებისკენ მოუწოდებს.
გავრცელებულ განცხადებაში ორგანიზაცია აღნიშნავს, რომ ერთობლივი ძალისხმევის მიზანია დასავლელი პარტნიორების მხარდაჭერის გაძლიერება და საქართველოს მოქალაქეთა უფრო ეფექტიანი მობილიზება. განცხადების თანახმად, მათი მთავარი გზავნილია: „არ ითანამშრომლო, დაასანქცირე, გაასამართლე „ქართული ოცნება“.
„პლატფორმა 2025“ გამოდის ინიციატივით, ერთობლივად მომზადდეს „ქართული ოცნების“ პროპაგანდისტული მედიის ჟურნალისტების, პროდიუსერებისა და მენეჯერების სია და მათი დასანქცირების მოთხოვნით მიმართონ დასავლეთის ქვეყნების მთავრობებსა და ევროკავშირს.
ამასთან, ორგანიზაცია კიდევ ერთ წინადადებას აყენებს, სამოქალაქო ჯგუფებისა და პოლიტიკური პარტიების მიერ უკვე მომზადებული სასანქციო პაკეტები გაერთიანდეს და მათი მხარდაჭერისთვის კოორდინირებული მუშაობა გაგრძელდეს.
განცხადებაში ასევე ნათქვამია, რომ „პლატფორმა 2025“-მა სხვა ემიგრანტულ და სამოქალაქო ჯგუფებთან ერთად უკვე მოამზადა სასანქციო წინადადებების პაკეტი, რომელიც დასავლეთის ქვეყნების მთავრობებსა და საერთაშორისო ორგანიზაციებს გადაეგზავნა. ორგანიზაციის ინფორმაციით, დოკუმენტი მოიცავს „ქართული ოცნების“ დაახლოებით 300 საკვანძო წევრისა და მხარდამჭერის მონაცემებს, მათ შორის პოლიტიკური თანამდებობის პირების, მოსამართლეების, პროპაგანდისტების, სასამართლო სისტემის თანამშრომლების, ცრუმოწმეებისა და ე.წ. ტიტუშკების შესახებ.
ორგანიზაცია ამ სიას „მზიას სიას“ უწოდებს. განცხადების ავტორების განმარტებით, სახელი უკავშირდება ჟურნალისტ მზია ამაღლობელს, რომელსაც ისინი თავიანთი ბრძოლის მორალურ და გამაერთიანებელ სიმბოლოდ მიიჩნევენ. მათი შეფასებით, აღნიშნული სახელწოდება საერთაშორისო პარტნიორებისთვის იქნება გზავნილი, რომ დასავლეთი არ უნდა შეეგუოს ჟურნალისტების, აქტივისტებისა და ქალების მიმართ ძალადობას, რეპრესიებსა და ადამიანის ფუნდამენტური უფლებების სისტემურ დარღვევას.
