საია ინფორმაციით, ორგანიზაცია 2019 წლის 20-21 ივნისის („გავრილოვის ღამის“) შედეგად დაზარალებულთა უფლებებს როგორც ეროვნულ, ასევე საერთაშორისო დონეზე იცავს.
ამ ეტაპზე ეროვნული სასამართლოები რამდენიმე დაზარალებულის საქმეზე უკვე დასრულდა და გადაწყვეტილებები კანონიერ ძალაში შევიდა, რის მიხედვითაც შინაგან საქმეთა სამინისტროს დაეკისრა როგორც მატერიალური, ისე მორალური ზიანის ანაზღაურება.
საიას ცნობით, გადაწყვეტილებები შეეხო მათ შორის მშვიდობიან დემონსტრანტებს, რომლებმაც მძიმე ჯანმრთელობის დაზიანებები მიიღეს. მიუხედავად იმისა, რომ შსს-სთვის განსაზღვრული ნებაყოფლობითი შესრულების ვადებიც გასულია, უწყება სასამართლოს განჩინებებს არ ასრულებს.
ორგანიზაციის შეფასებით, გაჭიანურდა იძულებითი აღსრულების პროცესი, ხოლო აღსრულების ეროვნული ბიურო თვეების განმავლობაში, ყოველგვარი სამართლებრივი საფუძვლის გარეშე, აჭიანურებდა სააღსრულებო წარმოების დაწყებას.
დაზარალებულები ბიუროსთან კომუნიკაციის გართულებულ პროცესზეც მიუთითებენ, მათი თქმით, მიუხედავად ზეპირი და წერილობითი მიმართვების, სრულყოფილი ინფორმაცია არ მიეწოდებოდათ, რა მიზეზით არ იწყებოდა აღსრულების პროცესი. საია აღნიშნავს, რომ ეს ბიუროს მიერ კანონით მინიჭებული უფლებამოსილების შეუსრულებლობას წარმოადგენს.
საია ასევე აცხადებს, რომ დაზარალებულთა ნაწილმა სტრასბურგის სასამართლოსაც მიმართა. 2024 წლის 7 მაისს, ადამიანის უფლებათა ევროპულმა სასამართლომ 26 მოქალაქის საქმეზე საქართველო პასუხისმგებლად ცნო ადამიანის უფლებათა ევროპული კონვენციის მე-3 მუხლის – წამების აკრძალვის – პროცედურული დარღვევის გამო. მოგვიანებით, მომჩივნების მოთხოვნით, საქმე დიდი პალატისთვის გადაეცა.
ორგანიზაციის ინფორმაციით, სტრასბურგის სასამართლოს დიდი პალატა ამ საქმეზე გადაწყვეტილებას 2025 წლის 11 დეკემბერს, თბილისის დროით 12:30 საათზე, საჯარო სხდომაზე გამოაცხადებს.
საია მოუწოდებს:
- აღსრულების ეროვნულ ბიუროს – გამოიყენოს ყველა მექანიზმი, რათა დაზარალებულთა სასარგებლოდ მიღებული გადაწყვეტილებები დროულად აღსრულდეს;
- შინაგან საქმეთა სამინისტროს – შეასრულოს კანონით დაკისრებული მოვალეობები და უზრუნველყოს სასამართლო გადაწყვეტილებების შესრულება.
