შინაგან საქმეთა სამინისტროს ინფორმაციით, საბაჟო გამშვები პუნქტის „სარფის“ ტერიტორიაზე განსაკუთრებით დიდი ოდენობით ნარკოტიკების უკანონოდ შემოტანის ფაქტზე ერთი პირი დააკავეს.
უწყების ცნობით, დაკავებულია 2001 წელს დაბადებული თურქეთის რესპუბლიკის მოქალაქე ს.დ.
სამართალდამცველებმა ბრალდებულის ხელბარგისა და პირადი შემოწმებისას ნივთმტკიცებად ამოიღეს განსაკუთრებით დიდი ოდენობით სხვადასხვა სახის ნარკოტიკული საშუალება, მათ შორის „კოკაინი“, „ჰეროინი“ და „მეთადონი“.
გამოძიება სისხლის სამართლის კოდექსის 260-ე და 262-ე მუხლებით მიმდინარეობს, რაც 20 წლამდე ან უვადო თავისუფლების აღკვეთას ითვალისწინებს.
