კირნათის ადმინისტრაციულ ერთეულში მერის წარმომადგენელს, ამავე სოფლის მცხოვრები, გზააბნეული ძროხის მოპარვასა და რეალიზაციის მცდელობაში ადანაშაულებს. თემურ გაბიტაძის თქმით, დაახლოებით ერთი წლის წინ, თურქეთიდან საქართველოს საზღვარზე ძროხა გადმოვიდა, რომლის დაკვლასაც გამგებელი და მისი თანაშემწე აპირებდნენ.
მოქალაქე “აჭარა თაიმსის” რედაქციას დაუკავშირდა და დახმარება ითხოვა. მისი თქმით, ხუთ თვეზე მეტია, დაკარგული საქონელი შეფარებული ჰყავს და სურს, პატრონს დაუბრუნოს, თუმცა თურქულ მხარეს ხმა ვერ მიაწვდინა.
თემურ გაბიტაძე გვიყვება, რომ დაკარგული ძროხის შესახებ რეპორტაჟი თურქულმა მედიამ მოამზადა, თუმცა სიუჟეტი უზუსტობებს შეიცავდა. მოქალაქე ამბობს, რომ სოფელში ჩასულ გადამღებ ჯგუფს სოფლის გამგებელი დახვდა და სულ სხვა ძროხა გადააღებინა, რითაც, მისი ვარაუდით, გამგებელმა ელზა ლასტაკანიძემ კვალი დაფარა.
რეპორტაჟი დაკარგულ ძროხაძე, რომელიც თურქულმა მედიასაშუალებამ მოამზადა:
მოქალაქე იმასაც აღნიშნავს, რომ ამ დროის განმავლობაში, ხელვაჩაურის მერთან შეხვედრა და ინფორმაციის მიწოდება სცადა, თუმცა არ მიიღეს. თემურ გაბიტაძემ პოლიციასაც მიმართა, მაგრამ მისი თქმით, სამართალდამცავ უწყებასაც ფაქტზე რეაგირება არ მოუხდენია.
ხელვაჩაურის მერის წარმომადგენელი ელზა ლასტაკანიძე “აჭარა თაიმსთან” საუბარში ადასტურებს, რომ თურქულ მედიას მართლა სხვა ძროხა გადააღებინა, თუმცა ამ გარემოებას გამგებელი იმით ხსნის, რომ სოფელში ჟურნალისტების ყოფნის პერიოდში, დაკარგული საქონლის ადგილმდებარეობა არ იცოდა.
“თურქეთიდან ჩამოვიდა მედია, ჟურნალისტებმა გვითხრეს, რადგან ამხელა გზა გამოვიარეთ, ძროხის გადაღება გვინდა აუცილებლადო. იმ წუთას არ ვიცოდი, სად იყო დაკარგული ძროხა, ამიტომ მსგავსი, სხვა მოსახლის ძროხა გადავაღებინეთ, ეს იყო რეალური მიზეზი და მეტი არაფერი. მე არ ვიცი, სად არის ძროხა ახლა და არც მაშინ ვიცოდი. მოქალაქეს, რომელმაც მოგმართათ, ჯერ ფსიქოლოგიური პრობლემები რომ აქვს, ეგ შეუმოწმეთ და დანარჩენზე მერე ესაუბრეთ. ხვალვე მივხედავ მაგ საქმეს და შესაბამის უწყებებს ვაცნობებ ბრალდებაზე, რომელსაც მე მიყენებს”, – განაცხადა ჩვენთან საუბრისას ელზა ლასტაკანიძემ.
მერის წარმომადგენელმა ელზა ლასტაკანიძემ, ჩვენთან საუბრისას, მოქალაქე ფსიქოლოგიურად არამდგრად პირად მოიხსენია, რაც, სამედიცინო ცნობების გარეშე, დაუშვებელია და დასკვნის არსებობის შემთხვევაშიც, პირის იდენტიფიცირება ამ ფორმით არაეთიკურია.
ინფორმაციისთვის: თემურ გაბიტაძის თქმით, თურქეთიდან კირნათში ძროხის გადმოსვლის ეს პირველი შემთხვევა არ არის. მოქალაქის მტკიცებით, დაკარგულ ცხენებსა და ძროხებს ხშირად კლავენ.
