ქობულეთში, რუსთაველის ქუჩაზე მცხოვრები სოციალურად დაუცველი სამწევრიანი ოჯახი დახმარებას ითხოვს. ოჯახი ქობულეთის მერიას საცხოვრებლით უზრუნველყოფას ან ქირით გადაყვანას სთხოვს.
სოფია სოვჩენკოს თქმით, ოჯახი ნაქირავებ სახლში უკვე 9 წელია ცხოვრობს. მათ ჰყავთ 5 წლის შვილი და იღებენ სოციალურ დახმარებას, თუმცა, თანხა საცხოვრებლის ქირის გადახდასაც აღარ ჰყოფნით.
საცხოვრებელი სახლი, სადაც ამჟამად ცხოვრობენ, ავარიულ მდგომარეობაშია. სახურავი ნაწილობრივ დაზიანებულია და წვიმის დროს წყალი ოთახებში ჩადის. ოჯახის თქმით, სახლის შეკეთებას ვერ ახერხებენ, რადგან საცხოვრებელი მათ საკუთრებაში არ არის.
მათი ინფორმაციით, სახლის მეპატრონე ამბობს, რომ უახლოეს პერიოდში აღნიშნულ ტერიტორიაზე ინვესტორი შედის და არსებული საცხოვრებელი სახლის აღება იგეგმება. შესაბამისად, ოჯახს არსებული ფართის დაცლაც მალე მოუწევს.
ოჯახი ქობულეთის მერიას სთხოვს, უზრუნველყოს მათი ქირით გადაყვანა ან ალტერნატიული საცხოვრებელი ფართით დაკმაყოფილება.
სოფია სოვჩენკო ასევე ამბობს, რომ სურს პირადად შეხვდეს ქობულეთის მერს თუმცა, ირაკლი ცეცხლაძე მას არ ხვდება.
საკითხზე ქობულეთის მერიაში კომენტარი არ გააკეთეს.
