ქობულეთში, სოფელ ცეცხლაურში მდებარე ახალი სანიტარული ნაგავსაყარი კვლავ არ ფუნქციონირებს, მიუხედავად იმისა, რომ მისი ამოქმედება ჯერ კიდევ რამდენიმე წლის წინ იგეგმებოდა. აჭარის ფინანსთა და ეკონომიკის არალეგიტიმური მინისტრის, ჯაბა ფუტკარაძის განცხადებით, პროექტის სამშენებლო ნაწილი დასრულებულია და ამჟამად მიმდინარეობს ტექნიკური აღჭურვის ეტაპი.
ჯაბა ფუტკარაძე დღესაც იმავეს იმეორებს, რასაც რამდენიმე წლის წინ. კერძოდ, მისი თქმით, მიმდინარეობს ნაგავსაყარის ტექნიკური აღჭურვა და ახალი მყარი ნარჩენების მართვის სისტემის დანერგვა.
„მიუხედავად მრავალი სპეკულაციისა, მათ შორის თქვენს მიერ დასმულ კითხვაშიც, მინდა აღვნიშნო, რომ ყველაფერი გარკვეულია. პროექტი აქტიურად მიმდინარეობს – დასრულებულია სამშენებლო ეტაპი და ახლა მიმდინარეობს დასკვნითი, აღჭურვის ფაზა. უკვე შერჩეული გვყავს საერთაშორისო კომპანია, რომელიც უზრუნველყოფს ახალი მყარი ნარჩენების მართვის სისტემის ტექნიკურ აღჭურვას. პროექტის ფარგლებში გათვალისწინებულია როგორც ნარჩენების მექანიკური, ასევე ბიოლოგიური დამუშავება. აუცილებელია ასევე შუალედური გადამცლელი სადგურის მშენებლობა, რაც ამ ეტაპზე პროცესშია. გარდა ამისა, დაგეგმილია ბათუმში არსებული ნაგავსაყარის კონსერვაცია, რის პროექტირებასაც ესპანური კომპანია ახორციელებს,“ – განაცხადა ჯაბა ფუტკარაძემ.
მიუხედავად ამისა, პროექტის ამოქმედების ზუსტი თარიღი კვლავ უცნობია. ფუტკარაძე ამბობს, რომ ნაგავსაყარის ოპერირება მიმდინარე წელს დაიწყება, თუმცა კონკრეტულ ვადაზე საუბარს თავს არიდებს.
ცნობისთვის: პროექტის საერთო საინვესტიციო ღირებულება 7 მილიონ ევროს შეადგენს, საიდანაც 3 მილიონი ევრო სესხია, ხოლო 4 მილიონი – გრანტი. ნაგავსაყარის ტექნიკური აღჭურვის კომპონენტს ევროპის რეკონსტრუქციისა და განვითარების ბანკი დამატებით 28 მილიონი ევროს დაფინანსებით უზრუნველყოფს.
ინფორმაციისთვის: პროექტი ითვალისწინებს ცეცხლაურში ახალი სანიტარული ნაგავსაყარის მშენებლობასა და ბათუმისა და ქობულეთის ორ არასტანდარტულ პოლიგონზე ეტაპობრივად დახურვას. თუმცა დღემდე, ნარჩენების განთავსება ისევ ადლიის ნაგავსაყარზე ხდება, რომელიც არაოფიციალურად 1965 წლიდან ფუნქციონირებს.
გარემოება: გაურკვეველი რჩება, როდის შეწყდება დროებით პოლიგონებზე ნარჩენების განთავსება და როდის ამოქმედდება სრულად ახალი, თანამედროვე სტანდარტებზე მორგებული ნაგავსაყარი. პროექტის გაჭიანურების ფონზე, სახელმწიფო ყოველწლიურად მნიშვნელოვან თანხებს იხდის სესხის მომსახურებისთვის რესპუბლიკური ბიუჯეტიდან.
