„ქართული ოცნების“ შინაგან საქმეთა მინისტრის მოადგილის, ალექსანდრე დარახველიძის განცხადებით, პაატა ბურჭულაძე, მურთაზ ზოდელავა, ირაკლი ნადირაძე, პაატა მანჯგალაძე და ლაშა ბერიძე დააკავეს.
დაკავებულებს ბრალი ედებათ საქართველოს კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ მოწოდებაში, ასევე ჯგუფური ძალადობის ორგანიზებაში, ხელმძღვანელობასა და მონაწილეობაში. აღნიშნული დანაშაულები 9 წლამდე ვადით თავისუფლების აღკვეთას ითვალისწინებს.
ალექსანდრე დარახველიძის თქმით, სამართალდამცველების მიერ მოპოვებული მტკიცებულებებითა და მედიასაშუალებებით გავრცელებული ვიდეომასალების შესწავლის შედეგად დგინდება, რომ თავისუფლების მოედანზე გამართული აქციის დროს ორგანიზატორების მხრიდან გაჟღერდა ძალადობრივი შინაარსის მოწოდებები. მსგავსი მოწოდებები, როგორც შსს აცხადებს, 4 ოქტომბრამდეც ფიქსირდებოდა. გამოძიება მიმდინარეობს საქართველოს სისხლის სამართლის კოდექსის 317-ე, 222-ე, 225-ე და 187-ე მუხლებით.
