გვიან ღამით, სოფელ ჩელტაში ავარიულ შენობაში კედელი ჩამოინგრა. შემთხვევის შესახებ „აჭარა თაიმსს“ ადგილობრივებმა აცნობეს.
მოსახლეობის თქმით, ჩამონგრეული კედელი შენობის საყრდენი კონსტრუქციის ნაწილი იყო, რაც არსებულ ვითარებას კიდევ უფრო სახიფათოს ხდის.
მათივე ინფორმაციით, შემთხვევის დროს არავინ დაშავებულა, თუმცა შენობაში მცხოვრები ოჯახები სერიოზული რისკის ქვეშ იმყოფებიან.
ადგილზე მივიდნენ საგანგებო სიტუაციების მართვის სამსახურის თანამშრომლები, პოლიცია და სასწრაფო სამედიცინო დახმარების ჯგუფები.
მოსახლეობა აცხადებს, რომ მსგავსი ინციდენტები შენობაში ადრეც არაერთხელ მომხდარა — საუბარია ჭერისა და კედლის ფრაგმენტების ჩამონგრევის შემთხვევებზე. მათივე თქმით, შენობა სახელმწიფოს საკუთრებაშია და მასში თვითნებურად 60-მდე ოჯახია შესახლებული.
„ჩვენ არ გვაქვს სხვა გზა. ამ შენობაში წლებია ვცხოვრობთ და ნგრევის შიში ყოველდღიურად გვაწუხებს. მიუხედავად იმისა, რომ შემთხვევა მოხდა, ადგილზე ხელისუფლების არცერთი წარმომადგენელი არ გამოჩენილა,“ — აცხადებენ ადგილობრივები და დახმარებას ითხოვენ.
