საქართველოში ქალებისა და კაცებისთვის ქონება, სამართლებრივად და შესაბამისად, ფორმალურად, თანაბრად ხელმისაწვდომია, მაგრამ სოციალური პრაქტიკები, რომლებიც ოჯახებში ვითარდება, ქმნიან გენდერულად უთანასწორო სურათს. ამის ნათელი მაგალითი, მუნიციპალიტეტების მერების ქონებრივი დეკლარაციებია, სადაც ნათლად სჩანს, რომ კაპიტალისა და მემკვიდრეობის დიდ წილს კაცები ფლობენ. ჩინოვნიკების მეუღლეები კი, მეტწილად შემოსავლებისა და ქონების გარეშე არიან.
AJARATIMES.GE ამ სტატიაში ეკონომიკური ჩაგვრის გენდერულ ნიშნებზე ვისაუბრებთ და შევეცდებით დაგანახოთ – როგორ გამოიყურება პატრიარქაული ქონებრივი დისბალანსი ჩინოვნიკების ოჯახებში.
18 დეკემბერს გამოქვეყნებულ სტატიაში, სადაც „აჭარა თაიმსი“ მუნიციალიტეტების მერების ქონებრივ დეკლარაციებზე ვრცლად საუბრობდა, აღმოჩნდა, რომ ქონების უმეტესობას კაცი ჩინოვნიკები ფლობენ, მათი მეუღლეების მიერ კერძო საკუთრების ფლობის მაჩვენებელი კი, მიზერულია.
მაგალითისთვის: ქონებრივი დეკლარაციის მიხედვით, ქედის მუნიციპალიტეტის მერს, როლანდ ბერიძეს TBC ბანკის სახელფასო ანგარიშზე 1167,55 GEL უფიქსირდება, ხოლო მის მეუღლეს, 7,47 GEL.
საყურადღებოა, შუახევის მერისა და მისი მეუღლის ქონებრივი დეკლარაციაც. ომარ ტაკიძისა და ხათუნა დუმბაძის წლიურ სახელფასო ანგარიშში სხვაობა 43 ათასი ლარია. შუახევის მერმა გასულ წელს ხელფასის სახით 48818,88 GEL მიიღო. მეუღლე, ხათუნა დუმბაძე დასაქმებულია ბათუმის ერთ-ერთ საბავშვო ბაღში, რომელსაც გასულ წელს ანაზღაურების სახით 5375,24 GEL ჩაერიცხა. მეუღლის სახელზე უძრავი ქონება არ ფიქსირდება.
აღსანიშნავია, ქობულეთის მერის, ლევან ზოიძისა და მისი მეუღლის, ლანა დანელიას ფინანსური ანგარიშები, რომლის მიხედვითაც მერს “საქართველოს ბანკში” სახელფასო ბარათზე 2507,3 GEL უფიქსირდება, ხოლო “საქართველოს ბანკში” ანაბარზე 444 GEL. რაც შეეხება მის მეუღლეს, ლანა დანელიას – “საქართველოს ბანკში” მიმდინარე 152,13 GEL. მერის სახელზეა უძრავი ქონება.
ქონებრივი დეკლარაციების მიხედვით, აჭარის მუნიციპალიტეტების ხელმძღვანელებს შორის ყველაზე დიდი კაპიტალი ხულოს მერს აქვს. ბერიძეების ოჯახში ქონების დიდი წილი მხოლოდ კაცებზეა რეგისტრირებული. მეუღლე, ნანული ბერიძის სახელზე მარტო ინდ მეწარმის სტატუსი და გასული წლის შემოსავლის სახით, 14 330 ლარი ფიქსირდება.
შედარებით უკეთესი მონაცემები იკითხება ხელვაჩაურის მერის ქონებრივ დეკლარაციაში. ირკვევა, რომ ზაზა დიასამიძის მეუღლე ფლობს მიწის ნაკვეთს, უძრავ ქონებას და ის ასევე, ერთ-ერთი კომპანიის მფლობელია. თამილა ჭურკვეიძე დასაქმებულია საჯარო უწყებაში, საიდანაც სოლიდური შემოსავალი უფიქსირდება.
საქართველოში ქალების ეკონომიკურად არასტაბილურობაზე მეტყველებს, საქსტატის მიერ გამოქვეყნებული 2023 წლის მესამე კვარტლის კვლევა. ბოლო მონაცემების თანახმად, ქალების საშუალო ხელფასი 1 459.1 ლარით, ხოლო კაცების – 2 233.9 ლარით განისაზღვრა. ეს კი, სქესობრივი ანაზღაურების დისბალანსზე მიუთითებს.
