ქობულეთში, სოფელ ქვედა აჭყვაში შექმნილი ეს პატარა სივრცე ერთ დიდ ისტორიას ჰყვება – სურვილზე, შრომაზე და სამშობლოსთან კავშირის შენარჩუნებაზე. დავით მახარაძემ, რომელიც დღესაც ამერიკაში ცხოვრობს, გადაწყვიტა, რომ საკუთარი შრომით დაგროვილი რესურსი საქართველოში დაებრუნებინა. ასე გაჩნდა საჩინოში კოტეჯების აშენების იდეა. ადგილი, სადაც ბუნება, სიმშვიდე და ზღვის პანორამული ხედები ერთ სივრცეში ერთიანდება.
მიუხედავად იმისა, რომ დავითის ყოველდღიური ცხოვრება ისევ ამერიკას უკავშირდება, საკუთარ ბიზნესს ახლა დისტანციურად მართავს. თუმცა ის ამ გზაზე მხოლოდ დამკვეთი არ ყოფილა, პირადად იყო ჩართული თითქმის ყველა დეტალში.
ხელოსნებთან ერთად გეგმავდა, აკონტროლებდა და ზრუნავდა, რომ საბოლოო შედეგი ზუსტად ისეთი ყოფილიყო, როგორსაც წარმოიდგენდა.
მისთვის ეს მხოლოდ ბიზნესი არ არის, ეს კავშირია საკუთარ ფესვებთან. კავშირი, რომელიც არ წყდება მანძილის მიუხედავად. კოტეჯების შექმნასთან ერთად, მან სოფელში მცხოვრებ ადამიანებსაც მისცა შესაძლებლობა. კერძოდ, დაასაქმა ადგილობრივები და მათთვის სტაბილური შემოსავლის წყარო გააჩინა.
დავითის ისტორია კიდევ ერთხელ გვახსენებს, რომ იდეას საზღვრები არ აქვს. თუ მონდომება და შრომაა, შესაძლებელი ხდება საქმეც მართო შორიდან და ამავე დროს შენი ქვეყნის განვითარებაშიც შეიტანო წვლილი. მისი გზავნილი მარტივია, სადაც არ უნდა იყო, თუ გინდა, შეგიძლია შენი ქვეყნის ნაწილი იყო.
დავითი განსაკუთრებულად უსვამს ხაზს სოფლის განვითარების მნიშვნელობას. მისი თქმით, ძლიერი ქვეყანა იწყება სწორედ ძლიერი სოფლით. იქ, სადაც ადამიანები არ ტოვებენ საკუთარ მიწას, სადაც ჩნდება შესაძლებლობები და იქმნება მომავალი.
