ბათუმში, კულტურული მემკვიდრეობის ძეგლის სტატუსის მქონე შენობას უნებართვოდ არემონტებენ. კონსტანტინე გამსახურდიას ქუჩის N13-ში, თითქმის სამივე სართულზე სარემონტო სამუშაოები მიმდინარეობს. ფაქტის ამსახველი ფოტოები “აჭარა თაიმსმა” 14 ნოემბერს გადაიღო.
შენობაში კერძო კომპანიებს საოფისე ფართობები აქვთ ნაქირავები. ადგილზე კარების, იატაკისა და კედლების სარეაბილიტაციო სამუშაოები აქტიურად მიმდინარეობს. აღნიშნული შენობა ამ ეტაპზე, პროფესიული კავშირების აჭარის რესპუბლიკურ გაერთიანებას ეკუთვნის.
კომენტარისთვის ჩვენ პროფკავშირების აჭარის ორგანიზაციას დავუკავშირდით, გვაინტერესებდა ვისთან იყო შეთანხმებული სამუშაოები. ლევან გურგენიძემ არ იცოდა კულტურული მემკვიდრეობის ძეგლზე რეაბილიტაცია ნებართვას თუ საჭიროებდა.
“შიდა სარემონტო სამუშაოები მიმდინარეობს, კოსმეტიკური. თუ დანაშაულია მივალთ სააგენტოში და დაველაპარაკებით, პასუხს ვაგებთ თუ საჭიროა. კარის გამოცვლა მე ვფიქრობ დანაშაული არაა, მზიდი კედლები არ ფუჭდება. განახლება ხდება მხოლოდ,” – თქვა ჩვენთან საუბრისას ლევან გურგენიძემ.
კანონდარღვევის შესახებ აჭარის კულტურული მემკვიდრეობის დაცვის სააგენტომ ჩვენგან შეიტყო, სადაც გვითხრეს, რომ მონიტორინგის ჯგუფი შემთხვევის ადგილზე გავიდა და ფაქტს სწავლობენ.
“სამართალწარმოება უკვე დაწყებულია, რომლის შემდგომაც გაირკვევა თუ რა სახის რეაგირება გატარდება,” – განაცხადეს სააგენტოში.
ცნობისთვის: აჭარის კულტურული მემკვიდრეობის დაცვის სააგენტოს ინფორმაციით, ვოლფენზონის სახლი XIX სს-ის ბოლოსაა აგებული. შენობის ფასადები შეულესავი აგურისაა. კედლის სიბრტყე ფასადების კიდურა ნაწილებში და შესასვლელთან რიზალიტითაა დანაწევრებული. ამავე მონაკვეთში განთავსებულია ლითონის აჟურულმოაჯირიანი და შეკიდული აივნები. ღიობები სხვადასხვა სიგანისაა თუმცა ფორმით ყველა ბრტყელთაღოვანი ან თაღოვანია. მათი საპირეები კრონშტეინებსა და მრგვალი პილასტრების შვერილ კაპიტელებს ემყარება.
აგურის ფასადზე წნულორნამენტიანი ქვის მოჩარჩოებული დიდი ფილები და აგურის ამოზიდული წყობით შესრულებული ტეხილხაზოვანი დეკორატიული ჩანართებია განაწილებული.შენობის კუთხეს ასრულებს მცირე ზომის ტეხილკარნიზიანი მანსარდის სათავსი. ეზოში შესასვლელი თაღოვანი ღიობი ლითონის ჭიშკრით მ.აბაშიძის ქუჩისკენაა განთავსებული. ნაგებობა სოლიდური მასშტაბისაა და კარგად აყალიბებს ქალაქის ამ მონაკვეთის გეგმარებით სტრუქტურას, აქვს გამოკვეთილი მხატვრული სახე და ახასიათებს სამშენებლო ოსტატობის მაღალი დონე.
აქვე დაგაინტერესებთ: კურსელი მოადგილედ – საკადრო ცვლილებები აჭარის კულტურული მემდვიდრეობის დაცვის სააგენტოში
