“შემაჯამებელი ოქმი შემდგარია. ამით ფაქტობრივად საარჩევნო პერიოდი დასრულდა,” – განაცხადა ცესკოს თავმჯდომარემ, გიორგი კალანდარიშვილმა, ოქმს ხელი მოაწერა და არჩევნების საბოლოო შედეგები შეაჯამა. სხდომა ხმაურის ფონზე მიმდინარეობდა.
ხელმოწერამდე ადმინისტრაციაში ინციდენტი მოხდა. სხდომაზე, რომელზეც არჩევნების შედეგებს აჯამებდნენ „ერთიანობა – ნაციონალური მოძრაობის” წარმომადგენელმა დავით კირთაძემ ცესკო-ს თავმჯდომარეს, გიორგი კალანდარიშვილს “შავი ლაქა” უწოდა და შავი სითხე შეასხა, რასაც მხარეებს შორის დაპირისპირება მოჰყვა.
„შენ ხარ სირცხვილი, ჩვენი ქვეყნის სირცხვილი. შენ ხარ შავი ლაქა“ – მიმართა დავით კირთაძემ ცესკო-ს თავმჯდომარეს.
ინციდენტის შემდეგ, რამდენიმე წუთში ცენტრალურ საარჩევნო კომისიაში სხდომა განახლდა. გიორგი კალანდარიშვილი სხდომაზე ახვეული თვალით დაბრუნდა.
„ვბრუნდებით ტექნიკური შესვენებიდან. მე მინდა მოვუხადო საზოგადოებას ბოდიში იმ უხერხულობის გამო, რის გამოც მომიწია სხდომიდან რამდენიმე წუთით გასვლა,“ – განაცხადა კალანდარიშვილმა და აღნიშნა, რომ მსგავსი ინციდენტები პროცესს ვერ შეაჩერებს.
ინფორმაციისთვის: ცესკოს მიერ გამოცხადებული საბოლოო შედეგებია ასეთია:
- „კოალიცია ცვლილებისთვის” – 11,03% (229 161 ხმა) მანდატი 19;
- „ერთიანობა ნაციონალური მოძრაობა” – 10,17% (211 216 ხმა); მანდატი 16;
- „ძლიერი საქართველო” – 8,81% (182 922 ხმა); მანდატი 14;
- „გახარია საქართველოსთვის” – 7,78% (161 521 ხმა) მანდატი 12;
- „ქართული ოცნება” – 53,93% (1 120 053 ხმა) მანდატი 89.
