შინაგან საქმეთა სამინისტროს ინფორმაციით, სასაზღვრო პოლიციის თანამშრომლებმა ბათუმის სამმართველოს სასაზღვრო სექტორ „გორგაძეთის“ დასაცავ მონაკვეთზე საქართველოს სახელმწიფო საზღვრის უკანონოდ, ჯგუფურად გადაკვეთის მცდელობის ფაქტზე უცხო ქვეყნის 2 მოქალაქე დააკავეს.
უწყების ინფორმაციით, დაკავებულები არიან 1991 წელს დაბადებული ნ.ა. და 1970 წელს დაბადებული ფ.ი. გამოძიებით დადგინდა, რომ ისინი სასაზღვრო-საკონტროლო გამტარი პუნქტის გვერდის ავლით, საქართველოდან თურქეთის რესპუბლიკის მიმართულებით ცდილობდნენ სახელმწიფო საზღვრის უკანონოდ გადაკვეთას.
მომხდარ ფაქტზე გამოძიება საქართველოს სისხლის სამართლის კოდექსის 19-344-ე მუხლის მეორე ნაწილის „ა“ ქვეპუნქტით მიმდინარეობს, რაც საზღვრის უკანონოდ, ჯგუფურად გადაკვეთის მცდელობას გულისხმობს და სასჯელის სახით 5 წლამდე ვადით თავისუფლების აღკვეთას ითვალისწინებს.
