ბათუმში ჩატარებული საპოლიციო ღონისძიებებიდან 17 დღე გავიდა, თუმცა გამოძიების შესახებ ოფიციალური ინფორმაცია ამ დრომდე არ გავრცელებულა. სპეცოპერაცია 27 თებერვალს, ჰაიდარ აბაშიძის ქუჩაზე ჩატარდა. ადგილზე მთელი დღის განმავლობაში მობილიზებული იყვნენ სპეციალური დანიშნულების რაზმის წევრები და პოლიციელები.
მიუხედავად იმისა, რომ ფაქტმა საზოგადოებაში დიდი ინტერესი გამოიწვია, ამ დრომდე უცნობია, რას უკავშირდებოდა სპეცოპერაცია, რა მიმართულებით მიმდინარეობს გამოძიება და დააკავეს თუ არა ვინმე აღნიშნული ოპერაციის ფარგლებში.
სახელმწიფო უსაფრთხოების სამსახურს ოფიციალური განმარტება ოპერაციის დეტალებთან დაკავშირებით ჯერ არ გაუკეთებია. საზოგადოებისთვის კვლავ უპასუხოდ რჩება მთავარი კითხვები – რა იყო სპეცოპერაციის მიზანი და რა შედეგით დასრულდა ის.
„აჭარა თაიმსის“ ინფორმაციით, ბინა, სადაც სპეცოპერაცია მიმდინარეობდა, 2023 წლის აპრილამდე გოჩა კონცელიძის საკუთრებაში იყო. აღნიშნული პირი რესან კონცელიძის ძმისშვილია.
» ბინა, რომელშიც სპეცოპერაცია მიმდინარეობს რესან კონცელიძის ძმისშვილს ეკუთვნის
ჰაიდარ აბაშიძის №60-ში, მე-18 სართულზე არსებული ბინა, გოჩა კონცელიძემ 2023 წელს შვილს – ნინი კონცელიძეს გადაუფორმა. რესან კონცელიძის თქმით, ნინი კონცელიძეს საცხოვრებელი ფართი გაქირავებული ჰქონდა, თუმცა კონკრეტულად ვისზე არ იცის.
სპეცოპერაციასთან და აღნიშნულ ბინასთან რაიმე სახის კავშირს კატეგორიულად უარყოფს რესან კონცელიძე, თუმცა ამბობს, რომ არ ჰქონდა ინფორმაცია ბინაში მიმდინარე პროცესების შესახებ. რესან კონცელიძე აჭარის ფინანსთა და ეკონომიკის მინისტრის მოადგილეა. მანამდე ის საქართველოს პარლამენტის „ქართული ოცნების“ წევრი იყო.
» აჭარის ფინანსთა და ეკონომიკის მინისტრის მოადგილედ რესან კონცელიძე დანიშნეს
» კონცელიძეების სამშენებლო ბიზნესი ბათუმში და საეჭვო კორუფციული სქემა
