ბათუმში, გორგასლის ქუჩის №70-ში მდებარე ისტორიულ შენობაზე რეკონსტრუქციის სამუშაოები აქტიურად მიმდინარეობს.
ადგილზე უკვე მოხსნილია ფანჯრები, გადახდილია სახურავი, შესასვლელის საწვიმარი გადახურვა მოხსნილი და შენობა სამშენებლო სამუშაოებისთვის მომზადებული.
ადგილზე განთავსებული საინფორმაციო დაფის თანახმად, ბათუმის მერიის მიერ 2026 წლის 1 ივლისს გამოცემული ბრძანების მიხედვით, აღნიშნულ მისამართზე მდებარე შენობის რეკონსტრუქციის არქიტექტურული პროექტი შეთანხმდა და მშენებლობის ნებართვა გაიცა.
დოკუმენტის თანახმად, ნებართვა ნაზი გობაძეძის სახელზეა. პროექტი 319 კვადრატული მეტრის მიწის ნაკვეთზე მდებარე II კლასის საოფისე ობიექტის რეკონსტრუქციას ითვალისწინებს.
საპროექტო მონაცემებით, შენობის განაშენიანების ფართობი 220.8 კვადრატული მეტრია, საერთო ფართობი კი 241.6 კვადრატული მეტრი, ხოლო პროექტით 58.5 კვადრატული მეტრის ტერასის მოწყობაც არის გათვალისწინებული.
საპროექტო მასალებიდან ჩანს, რომ რეკონსტრუქციის შედეგად შენობის იერსახე მნიშვნელოვნად შეიცვლება.
კულტურული მემკვიდრეობის დაცვის სააგენტოს ძეგლების საბჭოს ყოფილი წევრის, შოთა გუჯაბიძის ინფორმაციით, გორგასლის ქუჩის №70-ში მდებარე შენობა 1900 წელს არის აგებული.
ბოლო წლებში ბათუმში არაერთი ისტორიული და კულტურული მემკვიდრეობის ღირებულების მქონე შენობა რეკონსტრუქციის, გადაკეთების ან დემონტაჟის შედეგად თავდაპირველ იერს კარგავს, რაც სპეციალისტებისა და კულტურული მემკვიდრეობის დამცველების კრიტიკასა და საზოგადოების ნაწილის უკმაყოფილებას იწვევს.
ბათუმში კულტურული მემკვიდრეობის ძეგლი უნებართვოდ შემინეს— ნებართვა კი მოგვიანებით მოითხოვეს
ბათუმში კულტურული მემკვიდრეობის ძეგლს უნებართვოდ არემონტებენ
კურსელი მოადგილედ – საკადრო ცვლილებები აჭარის კულტურული მემდვიდრეობის დაცვის სააგენტოში
