ბათუმში, ე.წ. ბარცხანის დასახლებაში, სადაც წლების განმავლობაში სარკინიგზო უბედური შემთხვევები ხშირი იყო, ლიანდაგების გასწვრივ რკინის ღობე დაამონტაჟეს. კონსტრუქცია გარკვეულ მონაკვეთს ფარავს, თუმცა სკოლის მოპირდაპირედ შესასვლელი ღია მდგმარეობაშია.
მიუხედავად იმისა, რომ ღობის მოწყობა ადგილობრივების ერთ-ერთი მოთხოვნა იყო, მიმდებარე ტერიტორიაზე კვლავ არ არის დამონტაჟებული გამაფრთხილებელი ნიშნები და სპეციალური საყვირი სისტემები, რომელთა აუცილებლობასაც მცხოვრებლები არაერთხელ უსვამდნენ ხაზს.
ინფორმაციისთვის: რამდენიმე თვის წინ ამავე მონაკვეთზე მატარებელი მოზარდს შეეჯახა, რაც ფატალურად დასრულდა. ინციდენტის შემდეგ ადგილობრივებმა საპროტესტო აქცია გამართეს და გარკვეული დროით სატვირთო მატარებლის მოძრაობაც შეაჩერეს.
ცნობისთვის: ანალოგიური პრობლემა აწუხებს ცენტრალური ბაზრის მიმდებარე ტერიტორიასაც, სადაც რამდენიმე თვის წინ მატარებლის შეჯახების შედეგად ბავშვმა კიდური დაკარგა.
უსაფრთხოების ნორმების გარეშე – როგორ იქცა ცენტრალურ ბაზრთან ლიანდაგი საფრთხის ზონად
