„გარანტია როგორ იქნებოდა“ – ასე უპასუხა „აჭარა თაიმსს“ ბათუმის მერის მოვალეობის შემსრულებელმა გიორგი მურვანიძემ კითხვას, ჰქონდა თუ არა თანამდებობაზე დანიშვნამდე იმის გარანტია, რომ ის იქნებოდა ბათუმის მომავალი მერი.
მურვანიძის თქმით, ამ ეტაპზე აგრძელებს მოვალეობის შესრულებას და მმართველი გუნდის საბოლოო გადაწყვეტილებას ელოდება.
„შეთავაზების დროს იყო საუბარი, რომ უნდა შემესრულებინა მოვალეობა, როგორც ბათუმელ კაცს,“ – ამბობს მურვანიძე.
„ქართული ოცნების“ ბათუმის მერის მოვალეობის შემსრულებლის განცხადებით, კანდიდატებთან დაკავშირებით შესაძლოა ბევრი საუბარი იყოს, თუმცა საბოლოო გადაწყვეტილება ჯერ არ არსებობს.
„მოვალეობას ვასრულებ და ველოდები გადაწყვეტილებას. მზად ვარ, ჩავიბარო ეს საპასუხისმგებლო საქმე,“ – აღნიშნა მურვანიძემ ჩვენთან საუბრისას.
ცნობისთვის: „ბათუმელების“ ინფორმაციით, „ქართული ოცნება“ თვითმმართველობის არჩევნებზე თორნიკე ფაღავას კანდიდატურას განიხილავს.
ინფორმაციისთვის: ბათუმის მერის თაბამდებობა მას შემდეგ გახდა ვაკანტური, რაც არჩილ ჩიქოვანს თანამდებობა დაატოვებინეს. გიორგი მურვანიძე კი, 14 მაისს, აღნიშნულ თანამდებობაზე სულხან თამაზაშვილმა წარადგინა.
