გაყიდული აჭარა – როგორ ინაწილებენ უკონკურენტოდ რეგიონის ქონებას „ქართული ოცნების“ დონორები

„საერთაშორისო გამჭვირვალობა – საქართველომ“ აჭარის ფინანსთა და ეკონომიკის სამინისტროს მიერ ჩატარებული ელექტრონული აუქციონების კვლევა გამოქვეყნა. ორგანიზაციის ინფორმაციით, რეგიონში სახელმწიფო ქონების პრივატიზების პროცესში სერიოზული ხარვეზები, ჩაშლილი აუქციონები და დაბალი კონკურენცია ფიქსირდება.

კვლევის მიხედვით, 2025 წლის 1 იანვრიდან დღემდე გამოცხადებული 69 ელექტრონული აუქციონიდან 54 არ შედგა მონაწილეების არარსებობის გამო. ხოლო იმ 15 აუქციონიდან, სადაც გამარჯვებული გამოვლინდა, 8 უკონკურენტო იყო, მათში მხოლოდ თითო პრეტენდენტი მონაწილეობდა და უძრავი ქონება საწყის საპრივატიზებო ფასზე მინიმალური ფასნამატით, ერთ ბიჯში გაიყიდა.

არშემდგარი აუქციონების გამო კვლავ ვერ სრულდება აჭარის ბიუჯეტის საპრივატიზაციო გეგმა. 2025 წლის 9 თვეში დაგეგმილი 125 მილიონზე მეტი ლარის ნაცვლად, მხოლოდ 4.5 მილიონი ლარის ღირებულების უძრავი ქონება გასხვისდა, რაც დასახული გეგმის მხოლოდ 3.6%-ს შეადგენს.

არასამთავრობო ორგანიზაცია ყურადღებას ამახვილებს იმ გარემოებაზე, რომ გამარჯვებული კომპანიების ნაწილის მესაკუთრეები და ხელმძღვანელები „ქართული ოცნების“ მსხვილი შემწირველები არიან:

• ორ გამარჯვებულ კომპანიასთან დაკავშირებულ პირებს მმართველი პარტიისთვის ჯამში 1,387,000 ლარი აქვთ შეწირული. მათ ბათუმის კომერციულად მიმზიდველ ზონებში (ბაქოს ქუჩასა და პორტის მიმდებარედ) 20,000 კვ.მ-ზე მეტი მიწის ნაკვეთები და შენობები შეიძინეს.

• კურორტ გოდერძიზე მიწის ნაკვეთი უკონკურენტოდ მოიგო კომპანია შპს „ხიდი-2006-მა“, რომლის მფლობელიც აჭარის მთავრობის თავმჯდომარის, ზურაბ პატარაძის მეგობარი, ბიზნესმენი ედნარ პაპუნაიშვილია.

• დაფიქსირდა შემთხვევაც, როდესაც აუქციონში გამარჯვებული კომპანია (შპს „გოდე 2026“) აუქციონის გამოცხადების შემდეგ, მის დასრულებამდე სულ რაღაც ერთი კვირით ადრე დარეგისტრირდა.

„საერთაშორისო გამჭვირვალობა – საქართველოს“ შეფასებით, აღნიშნული ტენდენციები მიუთითებს, რომ რეგიონის ქონების გასხვისებისას ჯანსაღი კონკურენცია დარღვეულია, ხოლო პროცესი ხშირად პოლიტიკურ გავლენებთან და ინტერესთა კონფლიქტთან არის დაკავშირებული.