პარტია „გახარია საქართველოსთვის“ აცხადებს, რომ შუახევში, რეგიონული ტურნეს ფარგლებში, მათი გუნდის წევრების მიმართ პროვოკაციის მოწყობა სცადეს.
პარტიის ინფორმაციით, პარლამენტის წევრები და წარმომადგენლები ადგილობრივ პრობლემებს აშუქებდნენ, რა დროსაც, მათივე განცხადებით, „ოცნებამ პროვოკატორების ხელით პროვოკაციის მოწყობა სცადა“.
„ჩვენი გუნდის მხრიდან პროვოკაცია მშვიდობიანად აღმოიფხვრა. დამატებით ინფორმაციას პროვოკატორების ვინაობის შესახებ აუცილებლად მივაწვდით საზოგადოებასა და მედიას. თითოეული მოგზავნილი პროვოკატორი დაფიქსირებულია ფოტო-ვიდეო საშუალებებით“, – აცხადებს პარტია.
„გახარია საქართველოსთვის“ მომხდარს პარლამენტში მათ გუნდზე განხორციელებული თავდასხმის გაგრძელებად და განსხვავებული აზრის ჩახშობის მცდელობად აფასებს.
