ბათუმის საქალაქო სასამართლოსთან მოქალაქეებმა საპროტესტო აქცია გამართეს. ისინი უკვე ათ წელზე მეტია კორპუსის მშენებლობის დასრულებასა და ობიექტის ჩაბარებას ელოდებიან, თუმცა პროცესი ამ დრომდე გაჩერებულია.
მესაკუთრეების თქმით, თაყაიშვილის ქუჩის 50 ნომერში მშენებლობა გაურკვეველი მიზეზებით შეჩერდა და კომპანია “დიაისისთან” კომუნიკაციას ვერ ახერხებენ. მათივე განმარტებით, არ იციან რა ხდება რეალურად და როდის შეძლებენ ბინებში შესახლებას.
დავა მესაკუთრეებსა და მშენებელ კომპანიას შორის სასამართლოშია გადასული, თუმცა პროცესის გაჭიანურება დამატებით პრობლემებს ქმნის. მოქალაქეები აცხადებენ, რომ სასამართლოს გადაწყვეტილება დიდი ხანია არ აცხადებს, რაც, მათი შეფასებით, თითქმის 200 ოჯახს მძიმე სოციალურ და ფინანსურ მდგომარეობაში აყენებს.
აქციის მონაწილეები მოსამართლის გადაწყვეტილების დროულად გამოცხადებას ითხოვენ. სასამართლოს წინ გამართული შეკრების შემდეგ პროტესტის მონაწილეებმა მსვლელობით ბათუმის მერიამდე გადაინაცვლეს და პროცესში ადგილობრივი თვითმმართველობის ჩართვა მოითხოვეს.
მესაკუთრეები ხაზს უსვამენ, რომ მრავალჯერადი დაპირებების მიუხედავად, პრობლემა ვერ მოგვარდა. მოქალაქეები ამბობენ, რომ მიუხედავად იმედგაცრუებებისა, კვლავ ელიან, რომ „ქართული ოცნების“ ხელისუფლება საკითხზე რეაგირებას მოახდენს.
