„დინამო ბათუმმა“ ეროვნული ლიგის 31-ე ტურის მატჩი წააგო – გუნდმა „იბერია 1999-სთან“ შეხვედრა 0:2 ანგარიშით დაასრულა. პირველი გოლი 49-ე წუთზე ჯინჯოლავამ, ხოლო მეორე – 69-ე წუთზე ძაგანიამ გაიტანა.
აღსანიშნავია, რომ მატჩის მიმდინარეობისას „შავი ზღვის პირატებმა“ ბანერი გამოფინეს და კლუბის პრეზიდენტის გადადგომა მოითხოვეს. ბანერზე ეწერა: “PRESIDENT OUT! ქალაქი გიცდით… ჩვენი ქალაქის სული კვდება.”
ერთი ტურის შემდეგ, სატურნირო ცხრილში „დინამო ბათუმი“ მეექვსე ადგილს 37 ქულით იკავებს.
„თოლიებს“ და მეშვიდე ადგილოსან „გაგრას“ თანაბარი ქულები აქვთ, ხოლო პლეი-აუტის ზონაში მყოფ „გარეჯს“ ისინი ორი ქულით უსწრებენ.
შემდეგ შეხვედრას გიორგი ჭიაბრიშვილის გაწვრთნილი „დინამო ბათუმი“ 8 ნოემბერს გამართავს – ეროვნული ლიგის 32-ე ტურში გუნდი „ტორპედოს“ დაუპირისპირდება.
ავტორი: დიმიტრი გორგილაძე
