ოფიციალურად, „ცსკა სოფიას“ კაპიტანი და ბულგარეთის ეროვნული ნაკრების მარჯვენა მცველი ივან ტურიცოვი „დინამო ბათუმის“ ახალი ფეხბურთელია. ინფორმაციას ამის შესახებ თავად კლუბი ავრცელებს.
„საფეხბურთო კლუბი „დინამო ბათუმი“ მოხარულია გაცნობოთ, რომ ბულგარეთის ეროვნული ნაკრების მარჯვენა მცველი ივან ტურიცოვი კარიერას ჩვენს კლუბში განაგრძობს“, – ნათქვამია „დინამო ბათუმის“ განცხადებაში.
ტურიცოვმა „ბათუმელებთან“ ხელშეკრულება 2029 წლის ბოლომდე გააფორმა, მას შემდეგ, რაც სტამბოლში, კლინიკა „Acibadem Fulya“-ს ბაზაზე არსებულ „FIFA Medical Centre of Excellence“-ში სამედიცინო შემოწმება გაიარა.
„კონტრაქტი ახლახან გავაფორმე და ნამდვილად ბედნიერი ვარ, რომ აქ ვიმყოფები. მოტივირებული ვარ, ეს ახალი შესაძლებლობა მაქსიმალურად გამოვიყენო და მოუთმენლად ველი, როდის დავიწყებ თამაშს“, – განაცხადა ივანმა „დინამო ბათუმთან“ ინტერვიუში.
26 წლის მარჯვენა მცველი „ეფბეთ ლიგის“ ერთ-ერთ გრანდში, „ცსკა სოფიაში“, 2018/19 წლების სეზონიდან ასპარეზობდა. საერთო ჯამში, „წითელი არმიელების“ რიგებში ტურიცოვმა ყველა ტურნირზე 222 მატჩი ჩაატარა, შვიდი გოლი გაიტანა და 13 საგოლე გადაცემა შეასრულა. „ცსკა სოფიასთან“ ერთად 2020/21 და 2025/26 წლების სეზონებში ორჯერ გახდა ბულგარეთის თასის მფლობელი.
სამედიცინო შემოწმების გავლის შემდეგ, ივან ტურიცოვი ბულგარეთის ეროვნულ ნაკრებს დაუბრუნდა, სადაც ორ ამხანაგურ მატჩში მიიღებს მონაწილეობას. „თოლიების“ რიგებს ის 16 ივნისს შეუერთდება, ხოლო „დინამო ბათუმის“ მაისურით თამაშს 20 ივნისის შემდეგ შეძლებს.
ავტორი დიმიტრი გორგილაძე
