AJARATIMES.GE-ის ინფორმაციით, კლინიკა BMC-ში კიდევ ერთი ორსული დაიღუპა. ფაქტს სამედიცინო დაწესებულებაში ადასტურებენ.
ქალს კლინიკის ექიმებმა საკეისრო კვეთა ჩაუტარეს, რომლის შემდეგაც სხვადასხვა გართულების გამო ის დაიღუპა. პაციენტი ამავე კლინიკის თანამშრომელი იყო.
ინფორმაციისთვის: მარტში, სამედიცინო დაწესებულებაში საკეისრო კვეთის შედეგად ქალის ჯანმრთელობის მდგომარეობა დამძიმდა, პაციენტი მოგვიანებით სხვა კლინიკაში გადაიყვანეს, სადაც ის გარდაიცვალა.
ფაქტზე შინაგან საქმეთა სამინისტრომ გამოძიება “სისხლის სამართლის კოდექსის” 116-ე მუხლით დაიწყო, რაც სიცოცხლის მოსპობას გაუფრთხილებლობით გულისხმობს. გამოძიების შედეგები ამ დრომდე უცნობია.
მანამდე მოხდა კიდევ ერთი შემთხვევა, თებერვალში ახალშობილის გარდაცვალება ოჯახმა BMC-ის ექიმების დაუდევრობას დაუკავშირეს. ამ თემაზე უფრო მეტს წაიკითხავთ აქ.
აქვე დაგაინტერესებთ: BMC-ში სამშობიარო ბლოკი რამდენიმე დღის წინ დაიხურა, თუმცა პაციენტთა ნაწილი ბინაზე გაწერამდე კლინიკაში რჩება. ექიმები პირად საუბრებში განმარტავენ, რომ გადაწყვეტილება ბოლო დროს დაფიქსირებულ “უსიამოვნო შემთხვევებს” უკავშირდება.
