ბათუმში კობა ფარტენაძის მიმართ მუქარის შემცველი თავდასხმა მოხდა. ფარტენაძის თქმით, მას სიცოცხლის მოსპობით, მათ შორის დაჭრით, დაემუქრნენ.
მეტეოროლოგმა „აჭარა თაიმსს“ განუცხადა, რომ თავდასხმის ერთ-ერთი შესაძლო მოტივი მისი პროფესიული საქმიანობა იყო. მისი თქმით, თავდამსხმელი შეურაცხყოფის მიყენების დროს ტელევიზიას უცენზურო და შეურაცხმყოფელი ეპითეტებით მოიხსენიებდა.
თავდასხმის მუქარის შემცველი ეპიზოდის მცირე ნაწილის ვიდეოჩანაწერის გაკეთება ფარტენაძის თანმხლებმა პირმა შეძლო.
ფარტენაძის განცხადებით, ეს მასზე თავდასხმის პირველი შემთხვევა არ არის. ის ამბობს, რომ თავს დაცულად ვერ გრძნობს და მიიჩნევს, რომ შესაბამისი უწყებები მისი უსაფრთხოების დასაცავად სათანადო ზომებს არ იღებენ.
დაიწყო თუ არა მომხდარზე შინაგან საქმეთა სამინისტრომ გამოძიება, ამ ეტაპზე უცნობია. „აჭარა თაიმსი“ უწყებას დაუკავშირდა. პასუხის მიღების შემთხვევაში, მასალა განახლდება.
