თბილისში, რუსთაველის გამზირზე მორიგი, ხალხმრავალი საპროტესტო აქცია გაიმართა, სადაც ოპოზიციამ საზოგადოებას ის გეგმა წარუდგინა, რომელზეც ისინი შეთანხმდნენ. მათი თქმით, ქუჩების ყოველდღიური პიკეტირება გეგმის ერთ-ერთი მნიშვნელოვანი კომპონენტია.
ოპოზიციის გეგმა, რომელიც აქციაზე გიორგი ვაშაძემ გაახმოვანა:
- ვითხოვთ ახალი არჩევნების დანიშვნას;
- არ ვაღიარებთ მოპარულ არჩევნებს და არ ვცნობთ პარლამენტის ლეგიტიმაციას;
- დავიწყეთ წინააღმდეგობის მოძრაობა და ვშლით წინააღმდეგობის ფრონტს ჯერ თბილისში და შემდეგ მთელ საქართველოში;
- ყოველი მომდევნი პროტესტი იქნება უფრო და უფრო მწვავე, უფრო და უფრო კონკრეტულ მიზანზე ორიენტირებული;
- ვაგრძელებთ მტკიცებულებების თავმოყრას და სრულფასოვნად საერთაშორისო გამოძიებისთვის ყველა დოკუმენტაციის შეგროვებას, რომ ყველა დამნაშავე იყოს დასჯილი, ვინც მოპარა ხალხს არჩევანი;
- ამ ბრძოლაში ჩართვა არ არის მხოლოდ ჩვენი პასუხისმგებლობა, ეს არის თითოეული ჩვენგანის პასუხისმგებლობა და გთხოვთ, გავაცნობიეროთ, რომ ის ნაბიჯები, რასაც ჩვენ ყოველდღიურად შემოგთავაზებთ, მნიშვნელოვანია, ყველამ ერთად შევასრულოთ, იმისთვის, რომ საბოლოო გამარჯვებამდე მივიდეთ;
- ყველაფერს ვაკეთებთ ერთად, ეს არის ჩვენი, ყველას ერთად გასაკეთებელი საქმე;
- ეს გაგრძელდება მანამ, სანამ საბოლოო გამარჯვებას არ მოვიპოვებთ.
ინფორმაციისთვის: გეგმის გასაჯაროების შემდეგ, ოპოზიციონერმა ლიდერებმა, ხალხთან ერთად მსვლელობით ბარათაშვილის ხიდზე გადაინაცვლეს და გზა გადაკეტეს.
ცნობისთვის: ხვალ, 5 ნოემბერს, 14:00 საათზე სამი ოპოზიციური კოალიცია მსვლელობას სპორტის სასახლიდან გამართავს.
