საქართველოში იმ პენსიონერთა რიცხვი დიდია, ვინც საბანკო ვალდებულებას წლებია თავს ვერ აღწევს. მოხუცები სხვადასხვა პირობით, სესხს ძირითადად “ლიბერთი ბანკიდან” იღებენ და როგორც თავად ამბობენ, პირობები მეტწილად უსამართლოა.
პენსიონერების თქმით, ბანკი თავდაპირველად მათ ინფორმაციას სრულყოფილად არ აწვდის, რის გამოც ისინი ფინანსურად ზარალდებიან, უფრო მეტიც, ღარიბდებიან.
“ჩემი მეუღლე ოთხი წელია იხდის “ოვერდრაფტის” საფასურს, თუმცა სესხის დაფარვას დასასრული არ უჩანს. დავრეკეთ ეროვნულ ბანკში, შეგვპირდნენ დახმარებას, აგვაღებინეს ხელახლა სესხი ძველის გადასაფარად და ამით პრობლემა მოგვარებულად ჩათვალეს. ჩვენ ისევ ვაგრძელებთ პროცენტის გადახდას. ბანკში მისვლასა და საუბარს აზრი არ აქვს, არავინ გისმენს და ასეთ რთულ მდგომარეობაში ვართ, ჩემს ირგვლივ ბევრი მოხუცია ანალოგიურ მდგომარეობაში” – ამბობს “აჭარა თაიმსთან” საუბრისას პენსიონერი ციალა კილასონია.
რა მექანიზმი არსებობს საბანკო ვალდებულებისგან თავის დაღწევის – ამ თემაზე პარტია “მოქალაქეების” წევრები პენსიორენერებს ხვდებიან და მათ ცნობიერების ამათლებაში ეხმარებიან. მორიგი ასეთი შეხვედრა დღეს, ბათუმში, ევროპის მოედანზე გაიმართა, სადაც აღნიშნეს, რომ ხანდაზმულებს უწევენ იურიდიულ კონსულტაციას, ასევე, მათ კოლექტიური განცხადების დაწერასა და ბანკში წარდგენაში ეხმარებიან.
“შეხვედრების მიზანია იმ ადამიანების დახმარება, ვინც საკუთარი ძალებით ვერ ახერხებს „ლიბერთი“ ბანკთან გამკლავებას, რომელმაც მათ პანდემიის დროს სამთვიანი საშეღავათო პერიოდით სარგებლობის სანაცვლოდ სესხები სამი და ოთხი წლით უსამართლოდ გაუხანგრძლივა, ამასთან პენსიონერებს კონსულტაცია გაეწევათ ე.წ. „ოვერდრაფტებთან“ დაკავშირებით, რომელიც ბანკმა მათ ისე გაუფორმა, რომ არ აუხსნა რა ტიპის სესხთან ჰქონდათ საქმე. არაერთმა პენსიონერმა საპარლამენტო ჯგუფ „მოქალაქეების“ აქტიურობის შემდეგ აღმოაჩინა, რომ მისი სესხი ფაქტობრივად უსასრულოა, რადგან ყოველთვიური პროცენტის გადახდისას თანხის ძირს არაფერი აკლდება.
თბილისსა და რეგიონებში გამართული არაერთი შეხვედრა/კონსულტაციის შედეგად, სესხის ძველ ჩარჩოში დაბრუნების და განულების რამდენიმე შემთხვევა უკვე გვაქვს. შეხვედრების პარალელურად, დაზარალებულ პენსიონერებს ვეხმარებით მათი სასესხო პრობლემის შესაბამისად სპეციალურად შემუშავებული განცხადებების დაწერასა და ბანკში შეტანაში,“- განაცხადა ქეთევან თურაზაშვილმა “აჭარა თაიმსთან” აუბრისას
ინფორმაციისთვის: პრემიერმა არჩევნებამდე რამდენიმე თვით ადრე განაცხადა, რომ პენსიონერთა სესხებზე პროცენტული განაკვეთი დაიწევს.
