„საკალათბურთო კლუბმა ბათუმმა“ ისტორიული გამარჯვება მოიპოვა. FIBA-ს საკალათბურთო ჩემპიონთა ლიგის მეოთხედფინალში „ბათუმმა“ 86:85 დაამარცხა შვეიცარიული Fribourg Olympic Basket-ი და ტურნირის ნახევარფინალში გავიდა.
აღსანიშნავია, რომ „ს/კ ბათუმი“ გახდა პირველი ქართული გუნდი ტურნირის ისტორიაში, რომელმაც მატჩი მოიგო.
1/4-ფინალის შეხვედრა ბათუმელების ლიდერობით დაიწყო: პირველი მეოთხედი 16:22 დასრულდა, „დელფინებმა“ მეტოქეს ასევე მეორე და მესამე მეოთხედები მოუგეს (19:22 და 23:24). შვეიცარიულმა „ფრიბურგმა“ შეხვედრის მიწურულს შეძლო ანგარიშის გათანაბრება, თუმცა მატჩის დასრულებამდე 16 წამით ადრე გიორგი ოჩხიკიძემ მეტოქის კალათში გადამწყვეტი სამქულიანი ჩააგდო და „ს/კ ბათუმს“ გამარჯვება მოუტანა.
ორმაგი დუბლით, 17 ქულით, 10 პასით, ორი მოხსნითა და ეფექტიანობის 20-იანი კოეფიციენტით, მატჩის საუკეთესო კალათბურთელი გიორგი ოჩხიკიძე გახდა. „ბათუმის“ გამარჯვებაში ასევე წვლილი შეიტანეს ლეგიონერებმაც: ვალდი ზეფირიმ 18 ქულა და შვიდი მოხსნა დააგროვა, ხოლო კარსონ ბაშამმა 16 ქულითა და 12 მოხსნით ორმაგი დუბლი შეასრულა.
„საკალათბურთო კლუბი ბათუმი“ ჩემპიონთა ლიგის მომდევნო მატჩს 18 სექტემბერს გამართავს. ტურნირის ნახევარფინალში „დელფინები“ რუმინულ CSM Oradea-ს დაუპირისპირდებიან.
ავტორი: დიმიტრი გორგილაძე
