შინაგან საქმეთა სამინისტროს ინფორმაციით, თბილისსა და ბათუმში ჩატარებული კომპლექსური საპოლიციო ღონისძიებების შედეგად ნარკოდანაშაულში ჯგუფურად ჩართული უკრაინის 4 მოქალაქე დააკავეს.
გამოძიებით დადგინდა, რომ ბრალდებულები ორგანიზებულად მოქმედებდნენ და განსაკუთრებით დიდი ოდენობით ნარკოტიკული საშუალებების ე.წ. „დადების“ მეთოდით რეალიზაციას ცდილობდნენ.
ბათუმში ერთ-ერთი ბრალდებულის დროებითი საცხოვრებელი ბინის ჩხრეკისას ნივთმტკიცებად ამოიღეს ჯგუფურად, უკანონოდ შეძენილი და შემდგომი რეალიზაციის მიზნით დაფასოებული 1544 შეკვრა სხვადასხვა სახის ნარკოტიკული საშუალება, მათ შორის: ალფა-პვპ, კლეფედრონი, მეტამფეტამინი, მდმა და მარიხუანა.
ასევე, თბილისში ჩატარებული ჩხრეკების შედეგად, ბრალდებულების პირადი და საცხოვრებელი ბინებიდან, ასევე სხვადასხვა ლოკაციიდან ამოღებულია სარეალიზაციოდ გამზადებული განსაკუთრებით დიდი ოდენობით ნარკოტიკული საშუალება მეთადონი. პოლიციამ დამატებით ამოიღო ნარკოტიკული საშუალებების დაფასოებისთვის საჭირო მასალებიც.
წინასწარი შეთანხმებით ჯგუფურად, განსაკუთრებით დიდი ოდენობით ნარკოტიკული საშუალებების უკანონო შეძენა-შენახვისა და რეალიზაციის ხელშეწყობის ფაქტებზე გამოძიება საქართველოს სისხლის სამართლის კოდექსის 260-ე და 260-ე კვარტა მუხლებით მიმდინარეობს, რაც სასჯელის სახით 20 წლამდე ან უვადო თავისუფლების აღკვეთას ითვალისწინებს.
