„საერთაშორისო გამჭვირვალობა – საქართველომ“ საქართველოში პოლიტიკური პატიმრების განახლებული სია გამოაქვეყნა. ორგანიზაციის შეფასებით, ამჟამად 90 პირი აკმაყოფილებს პოლიტიკური პატიმრის ერთ ან რამდენიმე საერთაშორისო კრიტერიუმს.
როგორც დოკუმენტშია აღნიშნული, სია ევროპის საბჭოს საპარლამენტო ასამბლეის 1900 (2012) რეზოლუციით დადგენილი კრიტერიუმების საფუძველზეა შედგენილი. თითოეული საქმე ინდივიდუალურად არის შეფასებული, საქმის გარემოებების, სასამართლო გადაწყვეტილებებისა და საერთაშორისო ადამიანის უფლებათა სტანდარტების გათვალისწინებით.
ორგანიზაციის განმარტებით, პირი შეიძლება ჩაითვალოს პოლიტიკურ პატიმრად, თუ მისი თავისუფლების აღკვეთა დაკავშირებულია ფუნდამენტური უფლებების დარღვევასთან, პოლიტიკურ მოტივებთან, აშკარად არაპროპორციულ სასჯელთან, დისკრიმინაციულ მოპყრობასთან ან ისეთ სამართალწარმოებასთან, რომელიც სამართლიანი სასამართლოს მოთხოვნებს არ შეესაბამება.
დოკუმენტში თითოეული პირის შემთხვევაში მითითებულია, რომელი საერთაშორისო კრიტერიუმი ან კრიტერიუმები მიიჩნევა დაკმაყოფილებულად.
„საერთაშორისო გამჭვირვალობა – საქართველოს“ შეფასებით, პოლიტიკური პატიმრების ასეთი რაოდენობა მიუთითებს ქვეყანაში პოლიტიკურად მოტივირებული მართლმსაჯულების არსებობასა და ადამიანის უფლებების დაცვის მდგომარეობის გაუარესებაზე.
